Gwen mohatag P3M sa MCCI

CEBU, Philippines - Si Gobernador Gwendolyn Garcia misaad   nga mohatag siya og P3 milyones nga hinabang sa Mandaue Chamber of Commerce and Industry (MCCI).

Ang maong saad gihimo ni Garcia ngadto sa nanumpa nga mga bag-ong opisyal sa MCCI sa miaging adlaw didto sa dakbayan sa Mandaue. Kini agi og sukli   sa gobernador sa walay puas nga suporta   nga gihatag sa MCCI sa mga programa ug proyekto sa kagamhanan sa lalawigan sa Sugbo.

Kining maong tabang sumala sa gobernador gitumong alang sa kalampusan sa mga kalihokan sa pagsaulog sa MCCI sa Business Month karong Agosto nga kadungan   usab sa pagsaulog sa probinsiya sa Sugbo sa ika- 442 nga Founding Anniversary   niini.

Matud pa sa gobernador nga ang maong kalamboan usa sa mga bunga sa maayong “public -private partnership” o panagtambayayongay sa gobyerno ug sa pribadong sektor ubos sa iyang administrasyon.

Sa iyang bahin, si Eric Ng Mendoza nga mao gihapoy napiling presidente sa MCCI nagpasalamat kaayo sa maong hinabang sa gobernadora tungod kay makatabang kaayo kini sa ilang daghang proyekto.

Dugang pa ni Mendoza nga ang MCCI dili gyud mohunong sa pagsuporta sa mga programa ni Gobernador Garcia tungod kay makaayo man kini sa kinabag-ang mga Sugbuanon sama sa Obra Negosyo-Eskoyla program nga unang gihimo dinhi sa lalawigan sa Sugbo. (BANAT NEWS)