CEBU, Philippines - Ang kapolisan sa dakbayan sa Talisay nagpahigayon na og imbestigasyon bahin sa pagkatawo sa usa ka German national kinsa giingong mirikisa sa duha ka polis nga mitubag og alarma sa kawat sulod sa balay sa maong langyaw sa Pacific Heights Subdivision sa barangay Candulawan, dakbayan sa Talisay sa miaging adlaw.
Ang girikisa sa German kansang ngalan wala hisayri sa kapolisan mao sila si PO1 Euwen Pitogo ug PO3 Ferdinand Pablo.
Ang kapuyo sa maong langyaw nga si Deanielene Villegas, 42, sa sayo pa maoy mi-report ngadto sa mga polis nga gilungkab ang ilang balay sa wala hiilhing kawatan.
Apan ang mirespondeng mga polis mao hinuoy girikisa sa kapuyo ni Villegas.
Nasayran nga ang gihinol sa maong langyaw dili armas sa mga polis kundi ang kuwartang Euro sa maong German nga gituohan niyang gisakiyo ni Pitogo ug Pablo.
Ang kapolisan natahap sa pagkatawo sa maong langyaw tungod kay wala kini motug-an sa iyang ngalan ngadto sa mga polis ug bisan si Villegas nga iyang kapuyo nagdumili usab sa pagbutyag sa ngalan niini.
Si Chief Inspector Eddie Recamara, officer-in-charge sa Talisay City Police Station mibutyag sa mga tigbalita nga mangayo siya og ayuda sa Bureau of Immigration (BI) aron mailhan ang maong German ug mahibaw-an ang background niini kung legal ba ang pag-anhi sa nasud ug wala ba kini kasong giatubang sa ilang nasud.
Matud ni Recamara nga natahap kaayo sila niining tawhana nganong mahadlok magpaila sa mga otoridad.
Midugang si Recamara nga imbistigahon usab niya ang iyang mga sakop bahin sa pasangil nga gihilabtan niini ang kuwartang Euro sa maong German diin kun mapamatud-ang sad-an pahamtangan sila og bug-at nga silot. (WC) (BANAT NEWS)