CEBU, Philippines - Gitukod sa Mandaue City Police Office ang Task Force Ouano alang sa dinaliang kasulbaran sa pagbanhig patay sa negosyanteng si Antonio Ouano sa milabay’ng hapon diha sa North Reclamation Area.
Matud pa ni MCPO director Sr. Supt. Noel Gillamac pangulohan ni Supt. James Gofort ang maong task force.
Sa milabay’ng gabii dunay saksi ang ilang gidala sa buhatan sa kapulisan apan wala kini makahatag og klarong detalye sa maong insidente gumikan kay kusog ang ulan atol sa maong pagpamanhig.
Hinuon matod pa ni Gillamac tanang anggulo ilang gisusi sa pagdeterminar sa motibo sa maong krimen.
Wala usab nila isalikway ang posibilidad sa isyu sa yuta nga gikalambigitan sa biktima ug sa mga tawong mipasaka og kaso batok niini ang nagpaluyo sa maong ambush.
Samtang si Eric Mendoza ang Presidente sa Mandaue Chamber of Commerce and Industry (MCCI) mipadayag sa iyang kabalaka nga makaapekto kini sa business community sa dakbayan sa Mandaue.
Lakip sa misusi ni Ouano sa tambalanan diin kini gidala mao ang mga ig-agaw ug uyoang sila si kanhi mga Mayor Alfredo “Pedong” ug karon Bokal Thadeo “Teddy” Ouano ug si Mandaue City Mayor Jonas Cortes.
Si Ouano gikan pa mitambong sa court hearing sa Palace of Justice sa maong dakbayan dihang kalit gibanhigan pag-abot diha sa dalan eskina Mantawi Drive ug Ouano Avenue.
Usa sa gisugyot ni Gillamac mao ang paghatag og reward sa tawong makahatag kanila og igong kasayuran alang sa pag-ila sa mamumuno ni Ouano.
Gitataw ni Gillamac nga ang mao niyang sugyot wala pa usab hinuon nila mahisgoti ni Cortes.
Dugang pa ni Gillamac nga bisan sa maong nahitabong pagpamanhig patay kang Ouano sa gihapon iyang gipaniguro sa mga molupyo nga malinawon pa gihapon ang dakbayan hangtod niining panahona.
Luwas hinuon ang sekretarya ni Ouano nga si Nene Mangubat kinsa kauban sa biktima sa sakyanan atol sa hitabo ug padulong unta silang duha sa laing court hearing sa Branch 28 sa Regional Trial Court. (BANAT NEWS)