Cash reward sa mituman sa waste segregation

CEBU, Philippines - Aron hingpit nga iimplimentar sa mga barangay ang pagbahig sa mga basura, si Konsehal Eduardo Rama mibutyag nga adunay pasidungog ug pahalipay nga ihatag ang dakbayan.

Si Rama kinsa tsirman usab sa committee on public services sa konseho nagkanayon nga ang pagpili sa mga mananaug nagbase sa nagkadaiyang kategoriya nga naglangkob sa coastal, urban ug upland.

Ang barangay nga makalangkat sa unang puwesto makaangkon og P500,000 ug laing tulo ka barangay nga magsilbing runners-up makadawat og P200,000 matag usa.

Hinuon ang matag barangay nga dili makadaug makadawat gihapon og P3,000. Ang dakbayan migahin sa maong programa og P2.4 million diin tumong niini nga seryosong mapatuman ang saktong paghipos sa ilang basura.

Gawas sa maong kampanya, nagpadayon usab karon ang kanunay nga clean-up up drives sa siyudad nga giabagan sa nagkadaiyang barangay ug sa mga non-government organizations.  

Ang paghatag og pasidungog mahitabo sa hinapos nga bahin karong tuiga apan ang pagsusi sa performance sa mga barangay gisugdan na karong buwana.

“Mao na ang among gisabotan nga ang cash prize nga ilang madawat , gamiton unta nila sa ilang programa sa saktong paghipos sa basura, puwede ba ron sila mopalit og dugang garbage cans sa ilang lugar,” matud pa ni Rama.

Nasayran nga gikan sa pagpatuman sa “No Segregation,No Collection Policy” niadtong Abril, ang mga basura nga gikan sa naandan nga 500 nga tonelada nahimo na lang kini karon og kapin sa 200 ngadto sa 375 nga tonelada nga ilabay sa Inayawan Landfill matag adlaw. (BANAT NEWS)