Anti-RH Bill rally gihimo diha sa Basilica

CEBU, Philippines - Moabot ngadto sa kapin sa dos mil ka mga tawo ang mitambong kagahapon sa usa ka kalihukan batok sa Reproductive Health Bill nga gipahigayon sa Basilica del Sto. Niño Pilgrim Center. Mitambong sa maong kalihukan sila si Atty. Romulo Macalintal ug kanhi Manila Mayor Lito Atienza.

Si Atienza mipasabot nga dako siyang supak sa RH Bill gumikan kay wala kini magsunod sa prinsipyo sa simbahan busa siya nagmalaumon nga makaamgo ang mga magbabalaod nga nga dili aprobahan ang maong balaodnon.

Ang kalihukan gahapon gitawag og Solidarity Family Prayer Rally for Faith and Life’ kung diin gitambongan kasagaran sa mga sakop sa nagkadaiyang relihiyosong grupo.

Tumong sa maong prayer rally nga ibasura ang RH Bill ug ila kining gihaom sanglit ugma na ang State of the Nation Address (SONA) ni Presidente Benigno Noynoy Aquino III.

Samtang ang presidente sa District 1 sa Parish Youth Coordinating Council sa Sugbo nga si Ian Rey “Paw” Pableo misaysay sa Banat News  kagahapon nga dili sulbad sa kalisod ang RH Bill busa angayan kini nga ibasura. Matud pa niya nga ang edukasyon gyud unta ang angayan tagaan og pagtagad sa mga politiko sanglit mao kini ang instrumento aron maluwas sa kalisod ang mga tawo. (BANAT NEWS)