'Mi-sex slave' sa mga menor gikasohan

CEBU, Philippines - Pormal nang gipasakaan og kaso kagahapon sa kapolisan ang usa ka Australian national kinsa gipasanginlang mihimong-‘sex slaves’ sa upat ka mga babayeng menor de edad nga iyang gipapuyo ug gigastuhan diha sa iyang balay.

Si Angelo Farina, kinsa nasikop sa kapolisan sa dakbayan sa Naga niadtong Miyerkules sa gabii diha sa iyang balay sa sitio Santo Niño, barangay Inayagan sa nahisgutang siyudad gipaubos sa inquest proceedings diha sa Naga City Prosecutor’s Office kagahapon sa hapon.

Kini bisan paman sa panghimakak niini ug pagsupak sa mga ginikanan sa mga dalagita sa mga alegasyon nga gihimo niining sex-slaves ang mga bata tungod sa dakong natabang niini sa edukasyon sa mga biktima.

Si Chief Inspector Timmar Jamio Alam, hepe sa Naga Police Station mibutyag sa Banat News kagahapon nga silang mga polis lang ang mipasaka sa kaso batok kang Farina ug gihuwat nila ang mga ginikanan sa mga menor nga moduso usab og kaso batok sa langyaw.

Si Manlalaban Joan Saniel, executive director sa Children’s Legal Bureau (CLB) sa pakighinabi niini sa Banat News kagahapon nagkanayon nga kasong kalapasan sa Section 4A may kalabutan usab sa Section 6A sa Akta Republika 9208 kun “Human Trafficking ug kalapasan sa Section 5 B ug Section 10 B sa Akta Republika 7610 kun “child abuse”.Hayan ilaha sad kasohan ang mga ginikanan tungod sa pagpasagad sa ilang mga anak. (BANAT NEWS)