CEBU, Philippines - Usa ka 27 anyos nga dalaga gikabalak-ang gidagit sa wala hiilhing tawo human kini mapakyas sa pagpauli sa ilang balay didto sa dakbayan sa Carcar niadtong Huwebes sa buntag. Ang gipangita karon sa mga ginikanan mao si Luz Gaviola, 27 anyos, dalaga , nga taga Upper, Katugasan barangay Can-asujan, sa maong dakbayan. Ang amahan nga si Felipe Gaviola, 71, minyo, midangop sa kapolisan ug mipahibawo sa maong hitabo.
Si SPO1 Joel Panaganan sa Carcar City Police mibutyag sa Banat News nga si Luz Gaviola naghatud sa manghod niini ngadto sa Can-asujan Elementary School apan gibati sila og kabalaka kay wala naman kini mahiuli.
Gitug-an sa kapolisan walay kahiubos kanila ang dalaga kay buotan kini ug dali nilang masugo.
Dugang pa sa ginikanan nga wala usab sila makamatikod nga adunay hinigugma ang dalaga nga posibleng kapasanginlang mitaban kaniya.
Ang kapolisan nagpadayon karon sa ilang follow up operation, samtang nagduda sila nga may gipangluoran lang sa iyang ginikanan ang maong dalaga kun ugaling wala kini mokuyog og lalaki. (BANAT NEWS)