Digal, bid gikasuhan

CEBU, Philippines - Ang unang suspetsado sa pagdagit ug pagpatay sa 6-anyos nga bata nga si Ellah Joy Pique nga sila si Sven Erik Berger ug Karen Esdrelon mipasaka og kaso batok sa kanhi hepe sa Cebu Provincial Police Office (CPPO) ug sa mga sakop sa Bureau of Immigration.

Base sa report sa Balitang Bisdak nga kasong kriminal ug administratiba ang gipasakang kaso batok kang Sr. Supt. Erson Digal ug sa mga opisyal sa Bureau of Immigration (BI).

Si Esdrelon nagkanayon nga dili nila makalimtan ang ilang kasinatian sa kauwaw ug kahasol dihang gitanggong sila tungod sa pasangil batok kanila ni Berger nga maoy midagit ug mipatay kang Ellah Joy.

Ang korte mimando nga sila pabuhian human walay igong basehan ang kasong gipasaka kanila. Apan matud ni Esdrelon nga apektado ang ilang pagpuyo tungod kay namantsahan ang ilang dungog.

Sama sa mga ginikanan ni Ellay Joy kinsa nangita usab sila og hustisya sa nahitabo kanila matud ni Esdrelon.

Si Berger ug Esdrelon wala makontento sa desisyon sa piskaliya nga walay igong basehan ang kasong gipasaka batok kanila hinungdan nga gibasura kini. Ang gusto sa duha nga ang desisyon mga “innocent” o “inosente” sila. Si Provincial Prosecutor Jane Petralba mipsabot nga ang korte lang maoy mogamit og pulong nga “innocent” o “inosente”. Samtang sa piskaliya ang gamiton niini mao ang “lack of probable cause, lack of evidence, lack of merit” nga buot ipasabot inosente ang sinumbong. (BANAT NEWS)