Nasunogan sa Tejero makabalik gyud

CEBU, Philippines - Gipahibalo kagahapon sa hepe sa Department for the Welfare of the Urban Poor (DWUP) nga si Atty. Collin Rosell nga malakip tanan sa re-blocking ang 211 ka mga pamilya nga naapektohan sa sunog sa barangay Tejero sa miaging semana.

Matud pa ni Rosell nga makabalik gyud sa ilang mga luna ang mga biktima sa sunog subay sa bag-o niya nga pagtuon sanglit duna pa’y dakong lugar nga kabutangan kanila.

Kahinumduman nga naproblema sa miaging adlaw si Kapitan Jessielou Cadungog human niya masayri ang resulta sa unang pagtuon nga 106 ka pamilya lang ang masulod sa re-blocking gikan sa 211 ka pamilya nga maoy orihinal nga gidaghanon nga biktima sa sunog.

 “Makabalik man gyud ang tanan busa dili sila angay mabalaka, ilabi na nga patas na gyud ang gidak-on sa yuta ang madawat nila,” nagkanayon si Rosell kinsa mitataw nga bisan kadtong lumulupyo sa una nga miukopar og magamay man o madakong luna makadawat og patas nga sukod sa yuta.

Sa laing bahin, giklaro ni Rosell nga ang gibuhat nila karon nga road widening sa Tejero matawag og “road restoration.” Kahinumduman nga supak ang mga opisyales sa barangay sa himoong 10 meters ang pagpalapad sa dalan nga gimando ni Mayor Michael Rama.

Ang mga opisyales sa Tejero mipadayag nga dako ra kaayo ang 10 meters ug daghan usab nga mga balay ang maapektohan niini.

“Actually road restoration mana atong gibuhat karon, kay ang original gyud nga sukod ana kay 10 meters man gyud. Apan ang nahitabo karon kay nigamay na ang dalan kay gitukoran man og mga balay,” matud pa ni Rosell.

Samtang si Rama hugot sa iyang desisyon nga 10 meters gyud ang pagpalapad sa dalan sa Tejero gumikan kay dili gusto masubli ang nahitabo sa maong dapit diin maglisod og agi ang sakyanan kung dunay emerhensya nga mahitabo sama sa sunog.  - BANAT NEWS