Rodriguez pabayro'g P230 mil nga danyos

CEBU, Philippines - Si Johna John Rodriguez gimandoan na sa korte sa pagbayad og P230,725 nga danyos kang Konsehal Margot Osmeña.

Kini ubos sa “Notice For Garnishment” nga nadawat sa kompaniya nga gitrabahoan ni Rodriguez pinaagi sa pagtibhang sa iyang binuwang suweldo alang sa maong bayranan.

Nagkanayon si Osmeña nga bag-ohay lang niyang nadawat ang kopya sa maong orden gikan sa korte sa miaging adlaw. Si konsehala Margot kinsa kapikas sa kinabuhi ni Kongresista Tomas Osmeña sa habagatang distrito sa dakbayan sa Sugbo nagkanayon nga padayon lang gihapon siyang gidaut ni Rodriguez pinaagi sa Facebook.

Si Rodriguez nakonbikto niadtong 2006 sa kasong grave threats apan gipaubos kini sa probation pinaagi sa pagserbisyo sa iyang komunidad.

Ang maong kaso nagsugod dihang si konsehal Osmeña nakadawat og mga hulga pinaagi sa text messages gikan ni Rodriguez niadtong Disyembre 2001 ug migamit og mga dautang pulong batok sa konsehal.

Samtang gitataw ni Rodriguez kagahapon nga mopasaka siya og manifestation ngadto sa korte sanglit duha na siya ka tuig nga nahawa sa kompaniya nga gipadalhan sa “Notice of Garnishment.   - BANAT NEWS