Negosyante gipusil patay

CEBU, Philippines - Patay diha-diha ang usa ka negosyante human kini pusila sa usa ka wala hiilhing lalaki atubangan sa usa ka pension house sa may Macupa Corner Sabellano St., sa barangay Basak San Nicolas siyudad sa Sugbo niadtong Martes sa gabii.

Ang biktima giila sa kapolisan nga mao si Rolando Heramil Peliña, 53, minyo, usa ka negosyante og lending ug mga pension house, nga taga Gryhound Subdivision sa barangay Pardo.

Gidudahan sa kapolisan nga adunay gikasabot ang biktima sa pension house kay didto man kini mo-parking sa iyang sakyanan.

Subay sa pasiunang imbestigasyon ni SPO4 Alex Dacua ug mga kaubanan sa Homicide Section nasayran nga ang security guard nga si Ernesto Chavez Colot, 30, taga sitio Bamboo Whiteroad sa barangay Inayawan siyudad sa Sugbo ug sakop sa Bisda Security Agency nga maoy gidestino pagbantay sa West View Pension ug nakasaksi gayud dihang gipusil ang biktima.

Sumala sa kapolisan nga mao pay pag-abot sa biktima sa maong higayon   ug sa pagkanaog niini sa iyang sakyanan gipangayoan pa niya og maayong gabii.

Unya miabot ang usa ka motorsiklo nga gisakyan og duha ka tawo unya mikanaog ang angkas niini, miduol sa biktima dayong pusil sa naulahi.

Ang biktima unang naigo sa walang dughan ug nausban sa tuong nawong ug walang tangkugo nga maoy nakaingon sa iyang hinanali nga kamatayon.

Human mahagba sa yuta ang biktima, kalma kaayong mibalik og sakay sa motorsiklo ang kriminal ug mipadagan pahilayo sa maong dapit.

Hinuon ang gisakyang motorsiklo sa mga kriminal nasakmit sa mga tanod nga sila si Venancio Abella ug Edgar Camarino sa sudlonong bahin sa F. Llamas sa barangay Punta Princesa.

Ang mga sakop sa Crime Scene Investigation Unit (CSIU) nakapunit sa og duha ka kabhang .45 nga pistola, usa ka nalumping nang bala sa wala pa matinong kalibre, ug cell phone.

Suma pa sa taga pension house nga mao pa kadto’y unang higayon nga nakita nila ang biktima nga mo-check in unta sa ilang pension.

Matud sa kapolisan nga ilang susihon ang personal nga pagkatawo ug ang negosyo sa biktima basin may labot kini sa iyang kamatayon.

Kini maoy ikaduha sa nagsunod-sunod nga pagpamusil dinhi sa dakbayan sulod sa duha ka adlaw, diin ang una nahitabo niadtong Lunes sa gabii dihang ang usa ka babaye nga distributor sa usa ka herbal product gibanhigan sa duha ka lalaki nga nagsakay og motorsiklo sa barangay Guadalupe apan hinuon nabuhi ang biktima.   - BANAT NEWS