Sikyu nakaangol og bata sa dept. store

CEBU, Philippines -  Padayong nangita ang kapolisan sa dakbayan sa Lapulapu sa pag-ila sa gwardiya sa usa ka dakong tindahan nga aksidenteng nakapusil sa 14- anyos nga batang lalaki sa miaging gabii.

Si PO2 Carlos Barluado sa Homicide Section sa kapolisan sa maong dakbayan nga nahinabi sa Banat News nagkanayon nga nagdula ang biktima sa sports section sa nahisgotang department store dihang nahitabo ang pagpamusil.

Gikatahong giduol kini sa guwardiya ug gibadlong apan wala mopatuo sa hinungdan nga giaksiyonan sa maong guwardiya sa pag-ibot ang iyang armas apan aksidente kining miboto.

Sa pagboto sa armas mituasik usab ang mga splinter nga maoy nakaigo sa kalawasan sa biktima nga maoy hinungdan sa pagkaangol niini.

Daling gidala ang biktima sa Lapulapu City District Hospital apan human sa pasiunang pagtambal dali usab nga gibalhin sa Vicente Sotto Memorial Medical Center sa dakbayan sa Sugbo.

Dugang pa ni Barluado nga sa follow-up nga ilang gihimo nailhan na nila ang maong gwardiya apan nagdumili sila paghingalan niini hangtud nga di makompirmar sa biktima    kung mao ba gyud kini ang nakapusil niini.  - BANAT NEWS