Gwen keynote speaker sa CCAP

CEBU, Philippines - Si Governor Gwendolyn Garcia maoy gipili nga keynote speaker sa umaabot nga 10th National Convention of Clerk of Court Association of the Philippines (CCAP) nga ipahigayon karong Agosto dinhi sa Sugbo.

Kini ang gibutyag ni manlalaban Jeffrey Joaquino Jr., ang clerk of court sa Regional Trial Court sa syudad sa Sugbo kinsa nagkanayon nga nadesisyonan nila nga anhi sa Sugbo ang labing unang convention sa ilang asosasyon gawas sa Manila. Tungod usab kini sa kadaghan sa mga miyembro niining kapunongana nga nagtinguha sa pagbisita ug pagsuroysuroy dinhi sa lalawigan sa Sugbo.

Matud pa ni Joaquino nga kapin sa 400   ka mga clerk of court nga miyembro sa ilang asosasyon nga miuyon nga sa Sugbo ipahigayon ang ilang ikanapulo nga national convention tungod sa ilang personal nga kasinatian atol sa ilang pagbisita sa Sugbo.

Tungod niini, ilang giaghat ang gobernador ang mamahimong keynote speaker aron makita nila ang kaligdong sa liderato sa gobernadora.

Ang mga motambong sa maong convention maggikan sa nagkalainlaing lalawigan sa nasud nga wala pa makataak og Sugbo.  - BANAT NEWS