CIIS sa Custom bag-o og hepe

CEBU, Philippines - May bag-o nang hepe ang Customs Intelligence and Investigation Services (CIIS) sa Customs Port of Cebu karon human lahugaya ni Commissioner Angelito Alvarez ang tanan niyang sakop sa Bureau of Customs (BOC) sa tibuok nasud.

Si kanhi CIIS-Cebu Chief Rico Rey Francis “Coco” Holganza gibalhin ngadto sa Ninoy Aquino International Airport ( NAIA) isip Chief sa CIIS didto.

Ang mihulip sa iyang puwesto dinhi sa Sugbo mao si Manolo “Bong” Arevalo kinsa pormal nang milingkod kagahapon.

Samtang si Javier Alpano kanhi hepe sa CIIS Visayas ug Mindanao gibalhin usab ngadto sa Port of Subic isip OIC Chief sa CIIS didto ug ang mihulip kaniya dinhi sa Visayas ug Mindanao mao si CIIS Chief Lyceo Martinez nga gikan sa Appellate division on Legal Services sa ulohang buhatan sa BOC.

Sa Sub- Port of Mactan ,si Carlito Jumao-as nga maoy kanhi Chief sa Airport Operation Section (AOS) , karon nahimo na siyang hepe sa Port Operation Section (POS) sa maong sub-port .

Kini gumikan sa dakong pagsalig ni Sub-Port Collector Paul Alcazaren sa katakos ni Jumao-as nga modala sa POS.

.Giawhag ni Alvarez ang tanang opisyal sa BOC sa nasud nga mosubay sa “tuwid na daan” nga maoy adbokasiya sa pangagamhanan ni Presidente Simeon Benigno “Noynoy” Aquino III. (BANAT NEWS)