CEBU, Philippines - Suwerteng nakalingkawas gikan sa tinong kamatayon ang usa ka babayeng distributor sa usa ka herbal product nga gibanhigan sa duha ka mga lalaki samtang ang biktima nagmaneho sa iyang awto uban ang duha ka mga anak ug duha ka higala.
Nahitabo ang pagpang-ambush pasado alas-8 sa miaging gabii diha sa atubangan sa usa ka pribadong tunghaan sa dalan V. Rama Avenue sa barangay Guadalupe siyudad sa Sugbu.
Si Rowena Bagas Bensing, 32, taga barangay Calamba nahiagom og samad pinusilan sa walang bahin sa lawas apan nakahimo pa sa pagmaneho sa iyang awto paingon sa Chong Hua Hospital .
Subay sa pasiunang imbestigasyon ni PO3 Victor Ruel Ayuman, PO3 Geoffrey Gutual, PO2 Cristobal Geronimo ug PO2 Julius Regis sa Homicide Section sa Cebu City Police Office ang biktima nagmaneho sa iyang kolor itom nga Honda Civic.
Ang duha niya ka mga higala nga sila si Jodell Gonzaga ug Melona Lopez ug iyang duha ka gagmay nga anak luwas hinuon sa maong pagpang-ambush.
Sigun sa asoy sa biktima sa kapolisan iyaha untang ihatud sa Guadalupe ang usa sa iyang higala apan pag-abot niya sa maong lugar kalit lang mitupad sa driver side ang duha ka lalaking nagsakay og motorsiklo ug ang backrider mipusil kaniya makadaghang higayon.
Human niini milahos pagpadagan ang mga kriminal paingon sa direksyon sa simbahan sa Guadalupe sa ilang pag-ikyas.
Ang mga sakop sa Guadalupe Police station pinangulohan ni Sr. Insp. Mario Monilar, City Intelligence Branch (CIB) pinangulohan ni Chief Insp. Romeo Santander padayon pa sa ilang imbestigasyon sa maong kaso apan usa sa gisusi karon mao nga posibleng gun for hires ang mga kriminal.
Gisusi usab karon ang mga nakaaway sa biktima nga posibleng maoy nagsugo sa maong krimen.
Ang Crime Scene Investigation Unit (CSIU) nakakuha og upat ka empty shells sa .45 nga kalibre sa armas nga posibling maoy gigamit sa mga mamumuno. (BANAT NEWS)