CEBU, Philippines - Nasikop sa kapolisan ang usa ka babaye nga namaligya og saging mantikaan nga sa samang higayon namaligya usab og shabu didto sa Basak Merkado dakbayan sa Lapulapu sa milabay’ng gabii.
Ang nasikop mao si Maria Salve Pangan , alyas Lotlot, 27, minyo nga residente sa maong dapit ug ilado kaayong tig-barbecue og saging.
Base sa pasiunang imbestigasyon sa kapolisan uban ni P/Insp. Glenn Hife nasuta nga si Pangan dugay na nilang gipanid-an gumikan sa taho nga gawas sa iyang pagpamaligya og saging mantikaan namaligya usab kini og shabu.
Sumala sa kapolisan nga si Pangan mismo maoy mohatod sa shabu ngadto sa balay sa mo-order kaniya sa maong matang nga ginadiling druga.
Human matino sa mga kapolisan nga positibo na ang suspek, dihadiha gilusad dayon nila ang buy bust operation nga misangpot sa pagkasikop ni Pangan.
Ang mga ebidensyang nasakmit sa mga kapolisan mao ang P500 nga buy bust money, laing P500 nga gituohang halin sa shabu ug 26 ka gagmay’ng pakite nga gituohang shabu.
Si Pangan mag-atubang og kasong may labot sa paglapas sa Akta Republika 9165 nga nagdili sa pagpamaligya ug paghupot sa illegal nga drugas. (BANAT NEWS)