Oliva gipatangtang ni Osmeña

CEBU, Philippines - Hingpit nang nabugto ang serbisyo ni City Treasurer Ofelia Oliva sa Dakbayan sa Sugbo human pakyasa sa Bureau of Local Government Finance (BLGF) ang hangyo ni Mayor Michael Rama nga lugwayan ang pangalagad ni Oliva.

Sayo niini mihangyo si Rama sa BLGF nga lugwayan ang serbisyo ni Oliva hangtod sa Enero 15, 2012 gumikan kay nakauyon siya sa performance niini.

Mabugnawong gidawat ni Rama ang desisyon ug dako ang iyang pagduda nga adunay mga dagkong tawo ang nagmaniobra niini nga iyang gihulagway nga “nagpa-mayor mayor”.

Hinuon nakaila ang mayor kung kinsa kining opisyala nga nagpaluyo aron mapakgang na ang serbisyo ni Oliva apan wala siya mobutyag sa ngalan sa maong opisyal.

Si Oliva ibalhin og destino sa Dakbayan sa Mandaue aron ihulip sa iyang anak nga si Regal.

Apan nasayran ug wala malilong nga si Kongresista Tomas Osmeña sa habagatang distrito sa dakbayan sa Sugbo maoy mihimo og lakang nga matangtang si Oliva sa iyang katungdanan dinhi sa dakbayan sa Sugbo.

Kini pinaagi sa suwat nga gipadala ni Osmeña ngadto kang Secretary Cesar Purisima sa Department of Finance nga naghangyo nga tangtangon si Oliva sa iyang puwesto sa dakbayan sa Sugbo ug ibalhin sa ubang Local Government Unit kay “overstaying” na kini sa maong posisyon.

Sumala pa ni Osmeña nga nakalapas kini sa Department Personnel Order 335-2003 nga nagtugot lang og duha ka extension alang sa mga OIC treasurer nga madestino sa usa ka LGU.

Nasayran nga ang termino ni Oliva napupos niadtong Enero ning tuiga sukad sa iyang paglingkod niadtong 2009. (WC) (BANAT NEWS)