CEBU, Philippines - Nalumos patay ang 5-anyos nga batang babaye nga nataligam-an atol sa ilang pagpangaligo sa swimming pool sa usa ka pension house sa barangay Pandan siyudad sa Bogo alas 5:00 sa hapon niadtong Domingo.
Ang napalgang patay mao si Chuchi Beth Gaviola, 5, molupyo sa Tupas St. , barangay Lourdes siyudad sa Bogo.
Matud ni PO3 Allan Dosdos, imbestigador sa Bogo City Police Station dihang nahinabi sa Banat News ang bata gidala sa suod nga higala sa mga ginikanan niini nga nangaligo sa maong pool.
Samtang nagkalingaw sa pagpangaligo ang 5-anyos nga bata kauban sa 10-anyos nga igsuon niini kalit lang na missing ang biktima.
Paglabay sa pipila ka oras nga pagpangita napalgan kini sa ilawom sa swimming pool nga wala nay panimuot hinungdan nga dali nila kining gidala sa Severo Verallo District Hospital apan gideklarar sa mga doktor nga dead on arrival. (BANAT NEWS)