CEBU, Philippines - Nabalaka sa ilang seguridad ang mga mag-uumang nagtikad sa usa ka giingong luna nga gipanag-iya sa gobiyerno human adunay usa ka pribadong tawo ang nangangkon nga ilaha ang maong luna ug nagpunay og padala og mga tawong nanghasi kanila.
Gipadayag sa executive director sa Farmers Development Center (Fardec) nga si Estrella Catarata nga gibati gihapon og kahadlok ang kapin 180 ka pamilya sa barangay Bonbon, sa lungsod sa Aloguinsan gumikan sa usa ka tawong nangangkon maoy tag-iya sa ilang gipuy-an.
Ang maong nangangkong tag-iya (wala hinganli sa Fardec) giingong makadaghan nang higayon nga mipadala og tawo sa ilang dapit nga nanghulgang ilahang kuralon ang yuta nga ilang giistaran. Giingong apo ang maong lalaki sa kaniadto unang nangangkong maoy tag-iya sa maong luna nga napakyas tungod sa kakulang sa mga kamatuorang sila maoy tag-iya niini.
Sumala pa ni Catarata nga tungod sa kabalaka nagpuli-puli og bantay ang mga mag-uuma sa ilang mga gitikad nga yuta sanglit kalit lang maabot ang mga sinugo sa maong tawo ug nabalaka silang basin makuralan ang ilang yuta.
Ilaha na usab kining gidangop ngadto sa kapolisan apan wala pay nadakpang responsable sa maong kasamok. “Kadaghan na gyud na nahitabo, luoy intawon kaayo ang mag-uuma kay dunay usahay nga dili sila makatarong og trabaho gumikan sa kabalaka nga maabot og kalit ang mga tawo unya mang-harass dayon,” matud pa ni Catarata.
Gitataw ni Catarata nga midangop na ang maong mag-uuma ngadto sa Department of Environment Natural Resources (DENR) ug Department of Agrarian Reform ug ilang nasuta nga “public land” ang kapin sa 160 ka ektaryang luna nga gipuy-an sa mga mag-uuma busa dako ang iyang gikahibulong kung nganong gipamugos gyud sa nagpailang tag-iya ang pagpakural sa maong dapit.
Dugang pa ni Catarata nga naghupot og tax declaration ang nagpailang tag-iya apan wala kini makapakita og “land title.”
Matud pa niya nga panguma maoy nag-unang tinubdan sa ilang panginabuhian busa dako kaayo kini og epekto kung makuha sa lain ang maong luna. (EIM) (BANAT NEWS)