CEBU, Philippines - Nabulabog ang mga residente sa sitio Camansi sa barangay Lorega-San Miguel human kalit nga mangabot ang mga sakop sa Special Weapons and Tactics human sila makadawat og report kabahin sa usa ka armadong lalaking nag-treasure hunting diha sa karaang sam-ang sa maong dapit kagahapon sa alas-11 sa buntag.
Duha ka lalaki ang gidala sa kapulisan ug gi-turnover ngadto sa barangay hall sa Lorega diin ang usa nailhan nga usa ka pulis nga sakop sa Regional Intelligence Division (RID) sa Police Regional Office-7.
Naila ang duha ka lalaki nga sila si PO3 Noel Monares ug Romy Ahong kanhi sakop sa Philippine Navy ug sakop sa Special Warfare Action Group (SWAG). Si Ahong maoy gihulagway sa mga residente sa dapit nga ‘escort’ sa upat ka mga wala pa mailhing tawo nga maoy nagkawot sa sementeryo.
Usa ka lalaki nga nahinabi sa Banat News ug mihangyo nga dili lang magpaila mitug-an nga niadto pang Domingo sa alas-2 sa hapon gisugdan og kawot sa unom ka mga lalaki.
Matud pa, dunay dalang daw metal detector ang grupo ug ang nagsugo sa pagpakawot mao ang usa ka lalaki nga nagpailang sakop siya sa RID diha sa rehiyonal nga buhatan apan wala siya makaila niini.
“Siyam ang kawotunon diri, kini untang usa nga gilungagan mao unta ni regalo sa pulis nila nga nikawot sa giingong bulawan sa ilawom,” matud pa sa maong residente.
Ang maong lugar gikatakdang patukoran sa siyudad og housing project ug duna nay gisugdan og tukod dili layo gikan sa karaang sementeryo sa maong lugar.
Gituohan sa mga residente nga kun duna may bulawan ang ilawom sa sementeryo, kini posibleng gipanag-iya pa kini sa mga hapon panahon sa ikaduhang gubat sa kalibotan.
Matud pa sa mga residente nga dili mahimong masipyat ang pagkawot sa ‘bulawan’ sanglit dunay detector ang pulis ug mao kini magtumbok ngadto sa ilawom.
Mokabat og siyam ang gikatakda untang dapit nga kawotonon sa maong mga tawo apan na-intriga ang mga residente sa dapit kay adunay migawas nga tabi-tabi nga ang matag lungag adunay gilubong nga dose ka binaritang bulawan.
Gani matud sa maong lalaki nga ang maong pulis mitabang pa og kawot niadtong miaging gabii apan wala sila moduol niini tungod kay armado kini ug duna pa kini escort.
Sila si Monares ug Ahong gidala sa barangay hall kagahapon sa udto diin si Ahong nagpunay og hapa ilawom sa lamesa sa kahadlok nga makuhaan og footage o kaha picture sa mga sakop sa media.
Si kapitan Fritzgerald Herrera nga nahinabi sa mga tigbalita nagkanayon nga ang report sa mga residente sa dapit bunga kini sa kakuryoso nga dunay ‘bulawan’ ilawom sa sementeryo.
Kini ang hinungdan nganong dunay nagkawot diha sa maong lugar apan iyang giklaro nga wala kini permiso gikan sa iyang barangay hinungdan nga iyaha kining ipahunong.
Matud ni Herrera nga wala hinuoy basehanan nga iyang pugngan sila si Monares ug Ahong sanglit wala silay nakuhang ebidensya base sa report nga armado sila.
Ang duha wala mohatag og pamahayag sa mga sakop sa media apan si Herrera mitataw pulos sila mihimakak nga nag-treasure hunting sila sa maong lugar kay duna silay gibisitang ilahang higala.
“Mao nay bunga sa kakuryuso, it turn out nga ingon ana, it is not clear, daghang report, actually visitor ni sila kay naa daw silay kaila sa lugar,” matud pa sa kapitan.
Si Monares nga gihangyo unta sa kapitan nga magpakuha sa iyang reaksyon sa media apan nagdumili kini. (BANAT NEWS)