Mga senior citizens gi-validate

CEBU, Philippines - Ang hepe sa Office of the Senior Citizens Affair (OSCA) sa dakbayan sa Sugbo nga si Guillermo Casinillo mipahibalo nga posibleng dunay inisyal nga pag-release sa financial assistance alang sa mga senior citizens sulod karong buwana.

Gibutyag ni Casinillo nga ang buhatan sa Department of Social Welfare and Services padayong nagpahigayon og validation alang sa mga senior citizens.

Matud ni Casinillo nga importante kaayo ang validation aron masuta kung kinsa kadtong nangamatay na nga senior citizen ug sa susamang higayon dili madoble ang numero sa ID.

Nasayran nga mokabat ngadto sa kapin sa 40,000 ka mga senior citizens ang tagaanan pa og tag P4,000   nga financial assistance kung basehan lang   kadtong nakabotar niadtong piniliay sa 2007 ug kung apilon ang 2010, moabot ngadto sa 50,000 ka mga senior citizens ang tagaanan sa siyudad.

Gipasabot ni Casinillo nga mag-agi og daghang proseso ang maong programa ug iagi usab kini sa buhatan sa Commission on Audit hinungdan nga dili pa siya kasulti og saktong petsa sa pag-release sa financial assistance.

Kasamtangang gilihok karon sa OSCA ang bag-ong guidelines sa pagkuha og financial assistance diin usa sa rekisitos mao nga nagpuyo sa siyudad sa Sugbo sulod sa lima ka tuig ang usa ka senior citizen una kini makaparehistro sa OSCA. Giklaro hinoun ni Casinillo nga tukion pa sa konseho ang gihimo nila nga guidelines sa dili pa kini ipa-implementar.

Una na nga gipadayag ni Mayor Michael Rama kaniadto nga ipadayon gyud niya ang pag apud-apod og financial assistance sa senior citizens nga unang gisugdan kaniadto sa kanhi mayor ug karon Kongresista Tomas Osmeña.   - BANAT NEWS