Programa sa panglawas ipatuman ni Ouano

CEBU, Philippines - Gipatuman ni Bokal Thadeo Ouano ang mga programa nga gitumong alang sa kaayohan sa mga molupyo sama sa panglawas gikan sa kabataan, hingkod na ang panuigon ug katigulangan.

Si Ouano nga nagrepresentar sa 6th district sa lalawigan sa Sugbo nga naglangkub sa lungsod sa Cordova, Consolacion ug dakbayan sa Mandaue hugtanong nagpatuman sa programa sa panglawas sa mga molupyo sanglit alang kaniya mao kini ang labing mahinungdanon.

Nunot sa mao niyang tinguha iyang gipaningkamutan nga ang botika sa barangay diha sa iyang distrito hingpit nga mabuksan sanglit pinaagi lamang niini makapalit ang mga molupyo og barato nga tambal sa higayon nga dunay masakit.

Ang Botika sa Barangay usa sa mga programa nga gipatuman sa Department of Health (DOH) lukop nasud.

Si Ouano miingon nga gikinahanglan kaayo sa mga kabataan nga mahatagan og kahimsog sa panglawas sanglit kabahin man kini sa ilang pagpangandam alang sa ilang paghingkod sa panuigon.

Dugang pa niya nga nagkinahanglan usab og barato nga mapalit nga tambal sa matag barangay tungod kay daghan ang nanginahanglan sama sa mga senior citizens nga nagkinahanglan usab og mga bitamina aron magpabilin ilang kahimsog bisan sa nagkadaku na nilang panuigon.  - BANAT NEWS