Dakbayan sa Mandaue magbutang og pasusohanan

CEBU, Philippines - Giplano ni Mayor Jonas Cortes nga ipahimutang sa ground floor sa city hall ang lactation station alang sa breastfeeding program nga iyang ipatuman sa maong dakbayan.

Si Cortes mipahibalo niini atol usab sa pagbukas sa agri-fair nga gipahigayon sa city hall plaza isip kabahin sa mga kalihukan nga gipahaum sa kasaulogan sa nutrition month karong tuiga.

Matud niya nga walay pagduha-duha nga ang gatas sa inahan maoy labing maayo alang sa kahimsog sa bata nga maoy nakaaghat kaniya sa pagbutang og luna alang niini.

Kini maoy makahatag og kasayon sa mga inahan nga naglakip na sa mga kawani sa city hall ug mga kliyente nga nagdala sa ilang anak alang sa pagpasuso niini.

Sa nasayran nga ang kagamhanan sa maong dakbayan pinaagi kang Mayor Cortes maoy nalakip sa pagpirma sa Memorandum of Agreement (MOA) uban sa Mandaue Chamber of Commerce and Industry (MCCI) ug National Nutrition Council sa rehiyonal niining buhatan alang sa pag-promote sa dakbayan sa lactation program ug pagpahimutang og breast feeding station sa ilang mga trabahoan.

Dugang pa ni Cortes nga nunot sa pagpatuman sa maong programa sa dakbayan iyaha nang gimando sa city health officer nga si Dr. Edna Seno ang pagpahimutang og lactation station sa city hall.

“This is part of our program in promoting the city as mother-child friendly,” dugang pa sa pamahayag ni Mayor Cortes.  - BANAT NEWS