CEBU, Philippines - Mapasigarbohong gipahibalo sa executive director sa City Resource Management and Development Center nga si Allan Bautista nga duna siya’y gipahimutang karon nga city hall sa Bukid Unit diha sa Barangay Taptap aron dili maghago ang mga tawo sa mga bukirang barangay nga moadto sa city hall alang sa importante nila nga transaksiyon sama sa pagkuha og birth certificate ug uban pa.
Gawas niini modawat usab sila og bayad sa kuryente ug sila na ang mo-remit niini ngadto sa Visayas Electric Company (VECO). Gituyo kini sa CREMDEC aron sayon na lang ang pagpahigayon og mga transaksiyon sa mga residente sa mga bukirang barangay imbes nga molugsong pa kini aron moadto sa siyudad.
Matud pa ni Bautista nga kamandoan gyud kini ni Mayor Michael Rama nga mahiduol ang katawhan sa city hall.
Dugang pa niya nga duna sila’y kaugalingong service vehicle nga maoy mopadala sa mga gikinahanglanon nga dokumento paingon ngadto sa city hall.
Matud pa ni Bautista nga daghan na og natabangan ang iyang mga departamento, gani usa sa ilang giplano karon nga ibutang na sa internet ang mga produkto sa mag-uuma sa kabukiran aron dali ra kini mapalit sa mga tawo ug sa maong pamaagi, mosamot kakusog ang industriya sa agrikultura sa dakbayan sa Sugbo. (BANAT NEWS)