Estudyante nga nag-pot session sikop

CEBU, Philippines - Mga nag-pot session nga mga tinun-an sa high school ang gironda sa guidance counselor ug tanod niadtong Biyernes sa hapon diha sa usa sa mga tunghaan sa dakbayan sa Mandaue.

Ang nasikop mao si Dexter Bohol, 21-anyos tinun-an sa 4th year high school samtang ang duha ka giingong mga kauban niini ang daling nakadagan dihang nakamatikod na kini sa pag-abot sa guidance counselor ug tanod.

Nasakmit gikan sa posisyon ni Bohol ang pito ka linikit nga pinaugang dahon sa marijuana.

Si PO2 Ranjie Lopez sa presinto 3 sa Basak Police Station nga nahinabi sa Banat News mibutyag nga ang guidance counselor dugay nang nakadawat og mga report kabahin sa mga estudyante nga mag-pot-session diha sa bakanteng lawak sa saringan sa tunghaan hinungdan nga ilaha kining gipanid-an hangtud nga naaktohan sila si Bohol ug duha ka kauban niining   nag-pot session.

Si Bohol kinsa nagtingkagol sa Basak Police Station gikatakdang pasakaan og kasong kalapasan sa Akta Republika 9165 kon “Comprehensive Dangerous Drugs Act of 2002”. (BDB)