Isda sa merkado gisusi'g di ba pinabuthan

CEBU, Philippines - Ang mga isdang baligya sa merkado publiko sa dakbayan sa Lapulapu gisusi kagahapon sa mga fishwarden sa maong dakbayan kun dili ba pinabuthan.

Ang pag-inspection gihimo human bansaya ang 80 ka fish warden sa kabarangayan sa maong dakbayan bahin sa pag-ila sa mga isda nga nakuha pinaagi sa dinamita ug hilo ilawom sa dagat.

Gitudloan sila sa maong mga kahibawo aron himoong kaabag sa anti-illegal fishing task force sa pagsumpo sa illegal nga panagat sa kadagatan sa maong dakbayan.

Si Mayor Paz Radaza miingon nga adunay mga barangay sa dakbayan nga walay dagat apan ang mga fish warden sa maong mga barangay ilang idestino sa mga mga barangay nga daplin sa dagat sama sa isla sa Olango ug uban pang barangay nga sakop sa maong dakbayan.

Matud pa ni ABC President Leo Mercado nga ang mga programa sa mayor sa maong dakbayan hugtanon nilang gisuportahan sanglit gitumong man kini sa kalamboan ug kaayohan sa mga molupyo sa maong dakbayan.

Mao usab si Konsehal Efren Herrera nga nahinabi sa Banat News miingon nga iyang gisuportahan ang kampanya batok sa illegal nga panagat sanglit dili kini makaayo sa mga mananagat nga hingtungdan.  (BANAT NEWS)