CEBU, Philippines - Wala na makaabot nga buhi sa tambalanan ang usa ka 30-anyos nga babaye human kini agtanga pagpusil sa wala hiilhing lalaki didto sa dalan Terry Ville, barangay Lahug, dakbayan sa Sugbo sa miaging hapon. Ang biktima mao si Jenny Consuelo, taga sitio Sayaw, barangay Kalunasan, dakbayan sa Sugbo .
Base sa imbestigasyon sa kapolisan nga si Consuelo ug ang kapuyo niini nga si Christopher Asoy, 27, ug ang higala sa biktima nga si Mary Grace Suarez, 24, nagkatagbo sa maong lugar. Si Asoy giingong nakabantay sa usa ka itom nga Honda XRM nga motorsiklo nga nagbalik-balik og agi sa ilang nahimutangan.
Sa ikatulong pagbalik niini, nanaog sa sakyanan ang angkas nga lalaki ug miduol sa ilang nahimutangan dayong singgit ug pangutana sa iyang kaubang naglingkod sa motor nga , “asa ani bay?” Dayon gidul-it ang sumbohan sa armas niini nga wala hisayri ang kalibre ngadto sa agtang ni Consuelo dayong kablit sa gatilyo ug sa pagbuto nahapla dayon sa yuta ang biktima.
Human sa pagpamusil kalma ra kaayong miangkas pagbalik sa nagpaabot nga motorsiklo ang kriminal dayong sirit pahilayo sa maong lugar. Si Consuelo daling gidala ngadto sa Vicente Sotto Memorial Medical Center diin ideklara nga patay na sa pag-abot didto. (BANAT NEWS)