700 ka tawo gitambalan sa taga So. Korea

CEBU, Philippines - Mikabat sa 700 kapin ka   mga molupyo sa Barangay Talamban ning dakbayan sa Sugbo ang giserbisyohan sa gipahigayong medical mission sa mga doktor gikan sa Yeosou City sa South Korea sa miaging adlaw.

Mitambayayong sa maong kalihukan ang kagamhanan sa siyudad sa Sugbo uban sa mga opisyales sa Talamban.

Ang maong kalihokan may labot sa kadugtongang sisterhood sa dakbayan sa Sugbo ug sa Yeosou City ,sa South Korea. Si Dr. Stella Ygonia , hepe sa Cebu City Health Department nagkanayon nga dako kaayo og natabang ang maong grupo ug gani wala gyu’y nagasto ang kagamhanan sa dakbayan sa Sugbo gawas sa sakyanan nga gisakyan sa maong mga doktor uban sa ilang mga kargamentong mga kahimanan.

Ang grupo sa mga doktor sa Yeosou maoy nagdala sa kaugalingon nilang mga medisina ingon man sa ilang pasilidad sa pag-check -up sa kondisyon sa panglawas sa mga pasyente.

Sumala pa ni Ygonia nga sa kapin 700 ka mga pasyente, 80 porsento niini mga bata nga nakasinati sa ubo ug hilanat.

Ang Armed Forces of the Philippines mitabang usab sa maong kalihukan ug midalit sila og libreng panupi sa mga lalaki sa Talamban.

Sa miaging gabii miduaw usab sa buhatan ni Mayor Michael Rama ang delegado sa Yeosou nga gipangulohan sa ilang mayor nga si Kim Chung-seog. Ang maong grupo mitunol og 60 ka computer sa siyudad alang sa nagkadaiyang tunghaang publiko ning dakbayan.

Giimbitar sa mayor sa Yeosou City si Rama ug ang ubang mga opisyales sa Siyudad sa Sugbo nga motambong sa kalihukan sa ilang Expo 2012 sa tunga-tungang bahin sa sunod tuig.

Ang maong kalihokan gitumong sa hustong pag-atiman ug pagpanalipod sa kalikopan. (BANAT NEWS)