Lapulapu mosang-at og mosyon

CEBU, Philippines - Ang kagamhanan sa dakbayan sa Lapulapu mosang-at dayon og motion for reconsideration batok sa desisyon sa Visayas Ombudsman sa pagsuspenso og unom ka buwan nga walay suweldo sa 25 ka mga opisyal ug kawani sa kagamhanan sa maong dakbayan .

Kini maoy lakang gihimo ni Mayor Paz Radaza agi og pagsanong sa awhag sa iyang mga abogado nga kinahanglang hatagan una og due process ang mga hingtungdan diin pinaagi sa isang-at nga motion, mapugngan sa korte ang pagpa-epekto sa kamandoan sa Ombudsman sulod sa lima ka adlaw.

Gimando sa Visayas Ombudsman Visayas ang pagsuspenso sa mga hingtungdang opisyal dihang gilupig ang mga ebidensya niini sa mga gipakitang kamatuoran sa kihante nga nagpamatuod nga gipaburotan kuno nila og taga liog ang presyo sa 470 ka mga computer nga ilang gipamalit niadtong 2005 alang sa mga eskuylahang high school nga iya sa kagamhanan sa maong dakbayan.

Matud pa ni Radaza nga human madawat niya ang maong kamandoan sa Ombudsman sa miaging adlaw, gikunsolta una niya ang iyang mga abogado bahin sa mga lakang nga angayang buhaton kun angay ba nga diha-diha ipatuman niya ang maong orden. 

Samtang si manlalaban Michael Dignos, ang OIC Legal Officer sa dakbayan sa Lapulapu kinsa kaubang suspensuhonon og unom ka buwan nga walay suweldo, nasagmuyo batok sa desisyon sa Ombudsman Visayas kalabot sa gipakanog nga hukom niini batok kanila.

Matud pa ni Dignos nga wala paminawa sa mga maghuhukom sa Ombudsman Visayas ang ilang pagpasabot uban sa mga ebidensya nga nagpamatuod nga ang pagbayad nila sa maong mga computer legal nga paagi.

Miingon si Dignos nga niadtong tuig 2004 himabaw gyud nga tag-P50 mil ang presyo sa matag usa ka unit, apan niadtong tuig 2007 mibahar na ang presyo niini.

Matud pa ni Dignos nga ang gibasehan ni Pelaez nga presyo sa kiha nga iyang gisang-at ngadto sa Ombudsman mao ang presyo sa maong mga computer   sa tuig 2007, busa gikonklusyonan dayon nga gipaburotan nila og tuyo ang presyo sa maong mga kahimanan.

 Nanghinaot lang si Dignos nga paminawon unta sa mga opisyal sa Ombudsman ang ilang motion for reconsideration ug libkason niini ang orden sa pagsuspenso kanila.

Base sa Ombudsman Order lakip sa suspensohon og unom ka bulan gawas kang Dignos mao sila si Teodolo Ybanez, City Administrator, mga miyembro sa Bids and Awards Committee nga sila si Victoria Andoy, Rogelio Veloso, Dr. Cepreano Flores, Engr. Sharon Bagiuo, Jerico Mercado, Engr. Maribeth Soronio, Marita Guiao, Leandro Dante, Ernesto Imbong, Rogaciano Tampus, Allan Gajudo, Helen Hilayo, Josephine Daclan, Leonardo Ruiz, Niceas Mata, Jose Retuya, Bruce Bael.

Bisan ang nangamatay na nga sila si Atty. Joseph Vincent Lim ug Fernando Tagaan ug ang miretiro na nga sila si Elena Pacaldo, Buenaventura Igot, Cleofe Solis ug Serena Uy sa DepEd lakip usab nga suspensohonon. (BANAT NEWS)