Maestro namatid og estudyante gikiha

CEBU, Philippines - Usa ka maestro sa Luray-2 National High School sa dakbayan sa Toledo gireklamo tungod kay namatid kuno kini sa iyang estudyante atol sa klase niadtong Hulyo 6, 2011.

Ang mireklamo ngadto sa kapolisan mao ang magtiayong Juanito Tito ug Juvilyn Tito, pulos hingkod ang panuigon, nga taga Poblacion, dakbayan sa Toledo.

Sumala sa ilang pamahayag nga gi-blotter sa kapolisan sa Toledo, nga nagtibi kuno ang ilang anak nga si Vincent, 15, sa pag-uli niini sa ilang balay niadtong miaging adlaw gumikan sa kasakit sa iyang lawas nga nasabak sa kusog kaayong patid sa iyang maestro, kansang ngalan gipugngan una sa kapolisan.

Gani sumala sa magtiayon nga wala makaagwanta sa kasakit nga gibati ang biktima ug mipauli kini sa ilang balay nga wala magpaabot nga mahuman ang klase sa maong adlaw.

Si Vincent nga nahinabi sa Banat News pinaagi sa telepono didto sa barangay Hall sa Luray-2 kagahapon mitug-an nga samtang nag-recite sila sa ilang leksyon sulod sa klase sa Araling Panlipunan nga subject, alas 10:00 sa buntag sa nahisgutang petsa, aksidenting nairog ang bangko nga gilingkoran sa ilang maestro dihang mibarog kini busa natikay-ang kini sa pagbalik unta niini og lingkod.

Unya miingon si Vincent sa pagbarog sa ilang maestro mihiwasa kini sa kasuko ug dayon gipatiran siya hinungdan nga mipaka ang iyang paa sa kasakit.

Gumikan sa kasakit ug kauwaw nga nasabak siya sa flying kick sa iyang maestro,migawas siya sa iyang classroom ug walay lingilingi nga mipauli sa ilang balay ug wala na siya maminaw sa iyang maestro nga mitawag kaniya.

 Si Juanito nga amahan ni Vincent mitug-an sa kapolisan nga gumikan sa kasakit sa paa nga gibati sa biktima ila kining gipakorasyonan ug nasuta nga puwerting pagkabun-oga sa paa niini.

Human makorasyoni gipa-blotter dayon nila kini sa buhatan sa kapolisan ug ingon man mismo didto sa ilang barangay hall sa Luray niadtong Hulyo 7, 2011.

Si barangay kapitan Elma Sulla sa Luray-2 mikonpirmar usab niini dihang nahinabi sa Banat News ug miangkon nga ila na kining gipadangat ngadto sa buhatan sa DEaprtment of Education (Dep-Ed) aron kahimoan og lakang..

Si Juanito mitug-an usab nga pormal na nilang gireklamo ngadto sa buhatan sa Dep-Ed Toledo kagahapon ang nahisgutang magtutudlo inabagan sa Bantay Barangay Correspondent nga si Allan Poloyapoy .

Hinuon pabalikon sila sa Lunes, tungod kay wala ang opisyal nga maoy gitahasan sa pagdawat og mga reklamo. (WC) (BANAT NEWS)