Usbaw sa Sept.

CEBU, Philippines - Ang usbaw sa suholan sa mga mamumuo dinhi sa Central Visayas paningkamutang mapatuman dayon apan posibleng dili ang gipangayong P100 matud ni Atty. Ernesto Carreon, legal chief sa Associated Labor Union-Trade Union Congress of the Philippines (ALU-TUCP).

Si Carreon kinsa usa usab sa labor representative sa wage board nga nahinabi sa Banat News kagahapon nagkanayon nga pakigbisogan niyang karong Septiyembre niining tuiga mapatuman ang usbaw sa suholan.

Apan matud niya nga posibleng dili matuman ang P100 usbaw sa suholan matag adlaw tungod kay posibleng maapektohan na ang mga employers niini.

Sumala pa niya sa tuig 2010 ang usbaw sa suholan P18 matag adlaw nga gibase sa National Economic Development Authority (NEDA) inflation rate report o pagtaas sa mga nag-unang palaliton sa milabay’ng tuig nga 3.5 porsiyento.

Ang presyo sa gasolina kaniadto P35 lang ang matag litro, ug karong ang inflation rate misaka na sa 5.1 porsiyento ug ang gasolina P56 na matag litro angayan lang ang P30-P40 nga usbaw.

Niadtong Huwebes, ang Regional Tripartite Wages and Productivity Board (RTWPB) mideklarar nga dunay supervening condition sa rehiyon nga basehan aron usbawan ang suhulan ug kagahapon gipadala na ngadto sa kaulohan ang resolusyon niini. (BANAT NEWS)