Obenza ubos og grado kang Radaza

CEBU, Philippines - Ubos kaayo ang ratings nga gihatag ni Lapulapu City Mayor Paz Radaza sa performance rating ni Lapulapu City Police Office Director P/SSupt. Anthony Obenza sulod sa walo ka bulang pagdumala niini sa kapolisan sa dakbayan.

Atol sa press conference, si Radaza mihatag lang og 6 rating kang Obenza gikan sa 10 ratings. Giklaro hinuon niyang dili pa niya masulting wala siya matagbaw sa serbisyo ni Obenza gumikan kay iya usab nakita nga naningkamot kini nga masulbad ang sunod-sunod nga patay.

Apan kini daw mibahad nga dili layong iyahang pahulipan si Obenza kung dili maputol ang nagsunod nga kaso sa pagpatay sa maong siyudad.

Giangkon ni Radaza nga dili ang Lapulapu ang adunay kaso sa mga pagpatay apan namatikdan niyang sulod na sa pipila ka adlaw nabaniog ang dakbayan nga maoy kanunay’ng may gipatay.

Nabalaka si Radaza nga makaapekto kini sa ekonomiya ug turismo sa dakbayan.

Si Obenza sa iyang bahin mipadayag nga ang kakulangan sa mga sugang dagitabnon sa mga hilit nga dapit sa mga kabarangayan ang usa sa hinungdan nga dali ra himuon ang krimen.

Hinuon si Radaza mimando na sa mga barangay kapitan pagsusi sa mga dapit nga sagad mahitabo ang krimen nga walay suga. (BANAT NEWS)