Mieskuyla gihapon bisan nasunogan

CEBU, Philippines - Usa ka uniporme ray naluwas sa usa ka tinun-an sa grade-3 sa Punta Princesa Elementary School kinsa bisan sa pagkaugdaw sa ilang balay misulod gihapon sa iyang klase kagahapon sa buntag.

Ang tinun-an sa Grade 3 nga si Theresa Jabalde mitungha gyud kagahapon gumikan kay dili siya buot maapektohan ang iyang grado.

“Giingnan man ko ni mama nga mo-eskwela lang ko kay basin mag-test mi,” matud pa ni Theresa kinsa miangkon usa lang ka uniporme ang iyang nasalbar.

Samtang ang 32-anyos nga si Amy Barotag mipadayag nga dili lalim ang iyang naagian atol sa pag-ulbo sa sunog, bugtong mga birth certificates lang sa iyang mga anak ang iyang nasalbar.

“Kadtong pagkasunog, naa man sa trabaho akong bana , kami ra gyud sa akong mga anak ang naa sa balay. Pagkadungog namo nga naay sunog, ang birth certificates ra intawon sa akong mga anak ang akong nasalbar,” matud pa ni Barotag.

Mitulo ang luha ni Barotag dihang iyang gisaysay sa Banat News ang kabahin sa inutang niyang sapatos alang sa iyang anak nga iyaha untang gisuwayan og balik sa ilang balay aron kuhaon apan napakyas siya tungod sa kadako na sa kalayo.

Ang maong sapatos gamiton sa iyang anak sa pag-eskuyla. Ang maong mga biktimang mga tinun-an kabahin lang sa mas daghan pang tinun-ang naapektahan sa maong sunog.

Samtang ang prinsipal sa Punta Elementary School nga si Daisy Rico moabot ngadto sa 138 nila ka mga tinun-an ang naapektohan sa sunog kung diin kasagaran sa mga uniporme ug libro niini ang nangaugdaw og apil.

Matud pa ni Rico nga kasagaran niini ang ming-absent kagahapon apan iyang gipasalig dunay make-up classes ang maong mga bata aron dili sila mabiya sa ilang pag-eskwela.

Gipaninguha usab karon sa prinsipal ang pagkolekta og bulontaryong kontribusyon gikan sa mga magtutudlo ug sa mga tinun-an aron matagaan og financial support ang mga tinun-an nila nga nasunogan.

Magpaabot una ang mga nabiktima sa sunog sa barangay Punta Princesa sa dakbayan sa Sugbu nga mahuman ang survey alang sa re-blocking sa ilang lugar alang sa pagpalapad sa dalan.

Kini maoy gimando ni Mayor Michael Rama sa tanang biktima sa sunog nga moistar lang una sa sports complex sa ilang dapit ug dili una magtukod diretso og balay sa ilang puwesto.

Ang mga mirespondeng bombero pinangulohan ni Sr.Supt. Anderson Comar naglisod pag-abot sa sentro sa kalayo tungod sa kahagip-ot sa agianan ug misumpay-sumpay pa sa ilang 12 ka fire hose aron makapaduol.

Nagkanayon si Rama nga nagkasinabot na sila sa kapitan sa Punta Princesa nga si Jose Navarro nga dili una i-release diretso ang mga housing materials samtang gipahigayon ang pag-survey sa area.

Migawas karon ang taho nga usa ka pribadong luna ang nasunugan apan gitataw sa mayor nga dili himuong rason ang sunog sa pagpahawa sa mga tawo sa ilang puwesto. (EIM) (BANAT NEWS)