2 bata nangaangol sa sunog

CEBU, Philippines - Duha ka bata ang nangaangol human nasunog ang ilang panimalay sa barangay Salagmaya sa lungsod sa Alcantara niadtong Martes sa alas 5:25 sa buntag.

Ang balay nga nasunog gipanag-iya sa magtiayong sila si Jose ug Mary-ann Pucdol, kansang mga anak nga babayeng nagpangidaron og 2-anyos napaso sa walang bukton ug ang maguwang nga 3-anyos nga lalaki nasamad usab sa tuong tuhod.

Matud ni SPO1 Raymundo Sala sa Alcantara Police Station dihang nahinabi sa Banat News subay sa imbestigasyon sa kabomberohan sa lungsod sa Alcantara ang magtiayon nanguha og kompay alang sa ilang binuhi nga hayop niadtong higayuna.

Nasayran usab nga sa wala pa ang hitabu mitay-og usab ang tulo ka sunod sunod nga paglinog sa Sugbo nga nakaapektar sa maong lugar niadtong higayuna ug maoy gituohang nakaingon sa sunog.

Matud pa walo ka metros ang gilay-on gikan sa panimalay niini ang wire gikan sa poste sa kuryente nga nagkutay sa panimalay. Dangtan og pipila ka gutlo nakabati og singgit ang magtiayon gikan sa ilang mga bata nga nangayo og tabang nga gisundan usab sa igsuon sa magtiayon nga nagsinggit ug nagpahibawo nga nasunog ang ilang panimalay.

Ang magtiayon daling mibalik sa ilang balay ug giluwas ang ilang duha ka mga anak nga didto pa sa sulod sa balay niadtong higayuna apan napaso na ang 2-anyos samtang ang maguwang nga lalaki naabtang naninguha sa pagsalbar sa iyang manghod bisan pa nga nasamad kini.

Hingpit gyud nga naulbo ang panimalay nga ginama sa light materials samtang padayun pa ang imbistigasyun sa kapulisan ug kabomberohan pagtumbok sa hinungdan sa sunog. (EIM)(BANAT NEWS)