13-anyos nga amang gilugos

CEBU, Philippines - Usa ka 13-anyos nga amang ang giingong gilugos sa usa ka delivery boy sa usa sa mga barangay sa dakbayan sa Mandaue.

Nadakpan hinuon ang suspetsadong gitumbok nga maoy milugos sa biktima nga si Lucio Taruc, 22, nagpuyo sa maong dapit ug usa ka delivery boy human moreklamo ang inahan sa biktima diha sa kapolisan.

Matud pa sa inahan sa bata iyang nakita ang anak nga gikan sa   lawak sa suspetsado ug dihang iyang gisita ang biktima mitug-an kini nga gilugos siya ni Taruc.

Gumikan niini gipahiling sa inahan ngadto sa Vicente Sotto Memorial Medical Center ang anak ug nasuta nga positibo kini nga gihilabtan hinungdan nga gipadakop sa inahan ang suspek.

Atol sa pagdakop ni Taruc hugot kini nga mihimakak nga iyang gilugos ang bata ug mipadayag nga iya kining gipanguyaban ug misugot nga mosud sila sa iyang lawak.

Apan bisan pa sa mga pasangil ni Taruc hugot nga mopasaka og kaso ang inahan sa biktima.(Bong Soriano/EIM)

Traysikol sa dakbayan i-regulate

Giumol na ni Mayor Michael Rama ang Tricycle Task Force aron maoy mo-survey ug mag-monitor sa gidaghanon sa mga tricycle units nga nagbiyahe sa nagkadaiyang barangay sa dakbayan ug ipaubos kini sa rehistrasyon.

Nasayran nga moabot sa 700 ka tricycle ang nagbiyahe karon tibuok siyudad ug nasuta ni Rama nga dunay mga kolorum niini busa gisugdan na ang pagpasusi niini.

Sumala pa sa mayor nga kinahanglan nga 500 ra ka mga tricycle ang mobiyahe sa siyudad ug kini magbase sa gidaghanon sa prangkisa.

Nakadawat og report si Rama nga dunay ubang mga operators ang magpahimulos pinaagi sa pag-umol og daghang units busa iyang gihulagway nga dili kini patas ngadto sa gagmay nga mga operators.

Mitahas si Rama sa maong task force og tulo ka buwan aron masuta ang kasamtangang estado sa mga tricycle.

Nagkanayon ang mayor nga importante kaayo ang maong pamaagi aron duna sila’y talaan sa drayber sa tricycle sa siyudad. (BANAT NEWS)