PPA malampuson sa pag-atiman sa mga probationer sa CV

CEBU, Philippines - Ang hingpit nga repormasyon   o pagbag-o sa kinabuhi sa mga piniriso nga giatiman   sa Parole and Probation Administration (PPA)7 maoy usa sa kalampusan nga gihatagan og gibug-aton sa pagsaulog sa ika-35 ka tuig nga anibersaryo sa maong buhatan sa kagamhanan karong Hulyo 24.

Si DOJ-PPA7 Regional Director Ofelia E. Quijano ug si Assistant Regional Director Al C. Cainglet mibutyag usab atol sa AGIO Forum didto sa ilang buhatan sa ika-upat nga andana sa Palace of Justice sa miaging Martes, nga dako usab kaayo og natampo ning maong kalampusan ang ilang mga volunteer probation aid (VPA).

Matud pa ni Quijano nga sa pagkakaron mikabat na og 1,200 ang katibuk-an sa ilang mga VPA sa tibuok rehiyon nga maoy nag-atiman sa di momenus 3,000 kapin ka mga probationer, parolado ug mga pardonee kon gihatagan og pardon.

Gipasabot niya nga ang mga probationer, parolado ug mga pardonee mao kadtong mga piniriso kinsa nagtinarong sa ilang serbisyo sulod sa prisohan ug samtang magpaabot nga mahuman ang ilang sentensya, gipagawas sila sa prisohan apan gipaserbisyo sila sa komunidad nga ilang gipuy-an ubos sa pagbantay sa VPA hangtod nga matapos ang ilang sentensya.

Atol sa nahisgutang forum mitambong usab ang mga VPA sa dakbayan sa Sugbo, Lapulapu, Danao ug Toledo uban sa ilang mga kliyente.

Ang gibantayan nilang binilanggo nga gipagawas sa korte ginganlan nila og kliyente.

Ang maong mga VPA mao sila si Rosemarie Gabuya ug Lucilda Gallarde sa dakbayan sa Sugbo, Ignacio Eias sa dakbayan sa Lapulapu, Marilou Molina sa dakbayan sa Toledo , Josefina Queroz sa dakbayan sa Danao ug Rene Remullo sa dakbayan sa Tanjay, Negros Oriental.

Samtang ang mga kliyente nga misaysay usab sa ilang mga kaagi ubos sa pag-atiman sa ilang mga VPA mao si Rhea Sable sa dakbayan sa Sugbo , Carlito Condiñera sa dakbayan sa Lapulapu, ug Arnold Salon sa dakbayan sa Danao.

Si Salon kinsa na-probationer sa kasong pagpamaligya og armas de fuego, mibutyag nga didto siya hidakpi sa kapolisan sa Mindanao samtang naghakot og mga armas de fuego gikan sa Danao aron ibaligya ngadto sa ilang suki sa Mindanao.

Human makasilbi og pipila ka tuig sa prisohan, gihimo siyang probationer hangtod karon, apan gumikan kay maayo siya og record sa ilang lugar ug maayo ang pagsilbi niya sa komunidad, gitugotan siyang makatrabaho ngadto sa Saudi Arabia isip drayber ug kasamtangan siyang mibakasyon sa Danao apan mobalik pa siya ngadto    karong Agusto.

Gumikan niini mapasigarbohon kaayo sila si Quijano ug Cainglet ingon man ang mga VPA gumikan sa kagaan sa ilang pag-atiman sa mga piniriso kay ang ilang mga kliyente wa magpabadlong sa ilang pagsilbi sa ilang tagsa-tagsa ka komunidad (BANAT NEWS)