Pugante sa Masbate nasikop sa Madredijos

CEBU, Philippines - Tulo ka mga pugante kinsa mipatay sa usa ka jailer sa prisohan sa lungsod sa Palanas, lalawigan sa Masbate niadtong Hulyo 5, 2011 nadakpan didto sa lungsod sa Madredijos, Bantayan Island kagahapon sa alas 10:00 sa buntag.

Si Sr. Insp. Jaime Santillan, hepe sa Madredijos Police Station miila sa mga pugante nga sila si Romeo Olasca, 24, taga barangay Parparod, lungsod sa Placer; Jessie Cabir, 21, taga barangay Poblacion, Dimasalang, Placer; Rommel Padailap, 25, taga sitio Sigilon, barangay Nipa sa lungsod sa Palanas; ug uban usab sa grupo ang usa ka 17 anyos nga si Argie Lectiones, tanan taga lalawigan sa Masbate.

Matud pa ni Insp. Santillan nga si Olasca kinsa maoy silbing tigpamaba sa grupo nag-atubang sa kasong murder, si Cabir, murder gihapon, ug si Padailap, kasong rape, ug nasakmitan og .45 kalibreng pistola; ug si Lectiones nga gipaubos karon sa imbistigasyon nganong mikuyog siya sa grupo sa mga pugante.

Ang maong kasayoran matud pa ni Santillan nadawat niya pinaagi sa usa ka spot report gikan sa kasundalohan sa Masbate bahin sa jailbreak nga nahitabo sa miaging Hulyo 5.

Matud pa ni Santillan nga gawas sa jailer nga napatay, may usa ka laing jailer ug ubang mga piniriso nga naangol.

Ang maong mga pugante midunggo didto sa barangay Maalat, lungsod sa Madredijos niadtong Martes sa alas 8:00 sa gabii.

Ang kapitan sa maong barangay nga si Perla Bacayo, maoy mipahibawo kang Mayor Salvador dela Fuente ug sa kapolisan hinungdan nga nasikop ang maong mga kriminal. (BANAT NEWS)