Sunog miulbo sa Punta Princesa

CEBU, Philippines - Taliwa sa kalisud sa agianan ug kakuwang sa tubig sa kabomberohan, ang uwan maoy nakatabang pagpawong sa kayo ug misalbar sa naglawod-lawod nga mga kabalayan sa barangay Punta Princesa ning dakbayan sa Sugbo nga gihugpaan na usab sa usa sa labing dako nga sunog kagahapon sa alas 5:00 pasado sa hapon.

Base sa report sa DYAB Abante Bisaya, nadawat sa kabomberohan ang alarma sa sunog sa alas 5:44 sa hapon ug nakontrolar kini human sa pipila ka minutos.

Usa sa mga bombero   sa Saturday Saints Church of Christ, grupo sa religious fire volunteers naangol dihang nasugsog sa kahoy ang iyang kamot samtang nagpadayon sa pagpawong sa kayo.

Ang mga kabalayang naugdaw sa wala pa mohugpa ang uwan sa hapit nang alas 7:00 sa kagabhion mikabat sa kapin kun kulang  90 , nga nahimutang sa mga sitio Tirinidad, Tuburan ug Merko.

Ang sunog kagahapopn maoy ika-upat sulod sa upat ka adlaw dinhi sa dakbayan sa Sugbo

Kini human sa sunog nga miulbo didto sa Mambaling ug Labangon niadtong Lunes ug sa Tejero niadtong Sabado.

Nasayran nga ang sunog kagahapon nga gipaubos sa general alarm nagsugod sa ikaduhang andana sa balay nga gipanag-iya ni Gregoria Bacon.

 Gikonpirmar ni Rosenda Bacon, anak ni Gregoria nga usa ka ginganlan og Domingo, may gitrabaho sa ikaduhang andana sa ilang balay dihang kalit lang nabati nila nga may mibuto , ug dayon miulbo ang kayo ug dali kaayo kining mikatap sa mga kasikbit nga balay nga ginama sa mga gaan nga materyales.

Nasayran usab nga usa sa mga problema   nga nasugatan sa mga bombero mao ang kakuwang sa ilang tubig ug ang kahagip-ot sa agianan nga naglisud sila sa pagpahiluna sa ilang mga sakyanan sa tubig.

Nasinatian usab ang pag-inilogay sa hose nga iya sa bombero pinaagi sa mga tawo nga gusto nga adto ipunting sa kaugalingon nilang balay ang pagpasirit sa tubig nga nakahatag usab og dugang kahasol sa mga kabomberohan.

Si Mayor Michael Rama kinsa mogikan na unta paingon sa Manila sa usa niya ka opisyal nga biyahe, mibalik gikan sa tugpahanan sa Mactan ug miadto sa dapit nga nasunogan.

Didto nasaksihan niya ang lain na usab nga problemang atubangon sa mga molupyo nga ubos gihapon sa iyang pag-atiman.

Ang kapolisan sa nagkadaiyang presinto sa siyudad maoy nagsilbing crowd crontol sa fire scene.

Si Kapitan Willy Go sa kasikbit nga barangay mipakatap usab sa iyang mga tanod nga miabag sa kapolisan sa pagkontrolar sa bul-og sa katawhan nga nakahatag og dugang kahasol   sa mga bomberong mikombati sa kayo.

Hangtod sa pagsuwat ning maong balita   ang mga dagkong opisyal sa bombero wala pa makahatag og tukmang bana-bana sa kadaot sa maong sunog ug ang gidaghanon sa mga balay nga hingpit nga naugdaw. Ug Sanden J. Anadia/WC (BANAT NEWS)