Kubol-kubol sa bombero gipaguba

CEBU, Philippines - Gipanghimakak sa dakong opisyal sa bombero sa dakbayan sa Talisay ang pasangil nga ang ilang buhatan sa Bureau of Fire Protection (BFP) sa barangay Poblacion, sa maong dakbayan gikatahong gitarokan og kubol-kubol alang sa mga pamilya sa bombero nga gihimo usab nga estambayanan sa mga babaye.

Matud pa ni Chief Inspector Vondrad Fernando Dobluis nga maoy Fire Marshal karon sa Talisay nga sukad sa iyang paglingkod isip hepe sa kabomberohan sa Talisay niadtong Abril 2011, iyang gi- inspection ang ilang buhatan apan wala siya’y nakitang mga babaye o pamilya sa mga bombero ang nagpuyo sa maong lugar.

Ang ilang buhatan sa Poblacion maoy sub-station sa Talisay City Fire Station kansang headquarter atua mahimutang sa silong sa city hall sa barangay Mohon.

Hinuon matud ni Dobluis nga may mga kuwarto nga gigama sa iyang mga sakop aron kapasilongan nila panahon sa ilang duty.

Gihulagway sa fire marshal nga ang ilang buhatan sa Poblacion karaan ug gubaon na, busloton na kaayo ang atop busa naggama nalang og kapasilongan ang iyang mga sakop buwahan kun mag-uwan dili sila mabasa.

Giangkon niya nga duha ka semana human niya hulipi ang kanhi fire marshal nga si Chief Inspector Felipe Canillas gimandoan dayon niya ang iyang mga sakop   nga ipaguba ang mga kwarto-kwarto tungod kay dili kini maayong tan-awon.

Matud ni Dobluis nga kaniadto si Canillas mihangyo sa lokal nga kagamhanan sa Talisay nga mapaayo ang ilang gusbat nang edipisyo apan hangtud karon wala pay pundo alang niini. WC (BANAT NEWS)