Hapon gibitik sa liog patay

CEBU, Philippines - Usa ka Hapones nga gituohang gipatay sulod sa iyang lawak sa gipuy-ang balay nga gituohang gibunalan og gahing butang ang agtang ug gihigtan pa sa extension wire ang liog. Ang biktima nga si Ukena Takao, 76, lumad sa Osaka , Japan nagpuyo sa KB Subdivision sa barangay Agus, dakbayan sa Lapulapu ug napalgang patay alas-7 pasado ang takna kagahapon sa buntag.

Gisusi sa kapolisan ang motibong tulis ang hinungdan sa pagpatay sa biktima. Sumala pa nga nawala usab ang cellphone niini ug abli na ang mga kabinet niini. Sa imbestigasyon sa kapolisan sa Lapulapu uban ni Insp. Juan Capacio nasuta nga adunay samad sa iyang ulo agi sa pagbunal og gahi nga butang ug may pisi nga anaa sa liog niini.

Matud pa sa usa ka Marily Paraquiles ang katabang sa biktima nga hapsay pa ang tanan sa dihang mibiya siya sa panimalay sa agalon sa milabay’ng gabii, apan sa iyang pagbalik kagahapon sa buntag nahibulong siyang wala pa mogawas sa iyang lawak ang Hapon.

Hinungdan nga gisaka niya kini apan nakurat nalang siya nga patay na kini ug nagkadugo hinungdan nga mitawag siya og pulis. Nagduda ang kapolisan nga dili lamang usa ang mihimo sa maong krimen. (BANAT NEWS)