3 bata nasalbar sa cyber sex

CEBU, Philippines - Tulo ka menor de edad nga batang babaye ang naluwas ug tulo usab ka hamtong lakip na ang inahan sa usa ka menor de edad ang gisikop atol sa hiniusang operasyon sa Provincial Intelligence Branch (PIB), Cordova Police Station, Children’s Legal Bureau (CLB) ug Department of Social Welfare and Development (DSWD) kagahapon sa buntag diha sa sitio Ubos sa barangay Cogon sa lungsod sa Cordova.

Apan wala madakpi sa kapulisan ang duha ka babaye nga maoy subject sa search warrant sa dihang ang usa nga tag-iya sa balay wala diha samtang ang usa nga iyang kauban nakaikyas.

Ang tulo ka menor de edad nga naluwas nagpangidaron 17, 14, ug 9- anyos nga nagtungha sa usa ka public school sa elementarya sa maong lungsod.

Samtang ang inahan sa usa sa mga batang naluwas gisikop uban sa laing duha pa ka hamtong babaye nga naabtan sa kapulisan diha sa balay nga gironda.

Gibasehan ang ronda sa kapulisan mao ang search warrant ni Judge Simeon Dumdom sa Regional Trial Court Branch 7 nga giisyu kagahapong adlawa nga kalapasan sa Section 4(e) relation to Section 6(a) ug Section 10(c) of R.A 9208 Anti-Trafficking in Persons Act of 2003.

Si Supt. Rodulfo Albotra hepe sa PIB nga nahinabi sa Banat News nagkanayon nga nakaikyas mao sila si Salome Ligan nga nakabantay kanila sa dihang ila nang gialirongan ang kusina sa balay ni Marilou Tabada.

Ang kapolisan naghinay-hinay sa pagtuktok sa balay sa pagpahigayon sa maong operasyon ug wala gani moibot sa ilang mga armas aron dili mangalisang ang mga bata diha sa sulod.

Apan si Ligan nakabantay ug daling nakalayat ug nakadagan. “Nalutsan gyud mi kay kini lagi akong order nila nga maghinay kay menor ang involved ani basin mahasi ba,” matud pang Albotra.

Si Tabada wala diha atol sa ilang operasyon apan base sa gihimong pagpaniid sa kapulisan kapin duha ka buwan na sila nag-operate niining cyber sex operation.

Subay sa ilang nakuha nga impormasyon nga sa higayon mosulod na ang mga bata sa balay ni Tabada ang duha ka bintana sa kusina taptapan og panapton aron mongitngit sa sulod.

Giingong si Ligan maoy mag-assist sa mga bata samtang mag-atubang sa camera ngadto sa ilang mga kustomer nga langyaw.

“Caught in the act nga naghubo ang mga bata,” matud pang Albotra.

Ang nakuha nga mga ebidensya sa kapulisan naglakip sa usa ka computer set, earphone, usa ka puti nga blouse, duha ka kolor blue t-shirt, usa ka kolor pulang bra ug usa ka green nga blouse.

Dunay mga papel nga nakuha nga gigamit pag-apply sa online payment sa mga langyaw’ng kostumer ug ang resibo atua ni Ligan sanglit siya usab ang mokuha sa kwarta nga ipadala sa langyaw.

Si Insp. Jonas Tahanlangit, deputy sa Cordova Police Station nga nahinabi sa Banat News nagkanayon nga adunay mihatag og impormasyon sa kalihokan nila ni Ligan ug Tabada.

Ila dayung gipahibawo si CPPO Director Sr. Supt. Patrocinio Comendador ug gimanduan niini si Albotra nga panid-an ang mga suspetsado.

Niadtong Biyernes mipahibawo siya sa mga residente sa maong lugar nga pagka Sabado duna siyay feeding program apan tumong ug tuyo niini aron makakuha siya og dugang impormasyon sa cyber sex operation sanglit usa sa menor de edad maoy iyang gidapit sa maong feeding program.

Kini maoy ikaduhang higayon nga dunay nadakpan sa maong lugar diin una niini kadtong magtiayon nga milawog sa lima nila ka anak ug usa ka batang silingan sa maong krimen.

Si Albotra sa iyang bahin nagkanayon nga ilahang iapil sa pagsang-at og kaso ang tulo ka mga babayeng hamtong lakip na ang inahan sa usa ka menor de edad gawas sa subject sa search warrant. Ang tulo ka mga bata anaa karun sa DSWD ug gipaubos kini sa counselling.

Ang kapitan sa maong barangay Andres Dinoy miingon nga dugay na siyang nasayod sa maong kalihokan ug gani iyaha pa kining gibadlong nga hunongon apan wala kini mopatuo.(EIM) (BANAT NEWS)