Tanod gibanhigan

CEBU, Philippines - Nakimay ang tudlo sa usa ka tanod human masabak sa usa ka bala gikan sa armas sa wala hiilhing tawo nga mibanhig kaniya didto sa barangay Ibabao -Estancia sa dakbayan sa Mandaue sa miaging hapon.

Ang biktima mao si Fernando Fernandez, 50, minyo, taga Purok Pajo sa barangay Ibabao Estancia sa maong dakbayan ug nagserbisyo usab isip barangay tanod sa maong lugar.

Si PO3 Nersas Baay sa kapolisan sa Presinto 1 sa Mandaue City Police Office nga nahinabi sa Banat News miingon nga gikan pa si Fernandez nga nagbantay sa dalan M.C. Briones sa eskina Sudlon ug Maguikay ug padulong na unta kining mopauli sa ilang balay.

Dihang sa iyang agianan nasigpatan niya ang wala hiilhing lalaki nga nagpasalipod sa poste sa kuryente nga nagtion na og armas kaniya.

Matud pa ni PO3 Baay nga gigamit ni Fernandez ang naantigohan niya sa ilang mga training, pinaagi sa pagdasmag niini ngadto sa kriminal, dayong tapi sa sumbohan sa armas, busa dihang mibuto ang tudlo ra niya sa tuong kamot maoy samdan ug nakimay.

Bisan sakit apan nakiglinayogay pa siya sa kriminal ug tungod kay usa ra sab ka bala ang dala niini misirit og dagan ang kriminal ug gipanimon ang armas de fuego niini.

Si Fernandez nagpatambal dayon sa iyang samad didto sa Mandaue City District Hospital.

Si PO3 Baay miingon nga wala pa nila matataw kun may labot ba   sa trabaho sa biktima ang hinungdan sa pagbanhig kaniya. (WC)  (BANATNEWS)