Fire hydrants sa siyudad ipasusi

CEBU, Philippines - Gimando ni Mayor Michael Rama ang pagtino kung pila gyud ka buok ang kasamtangang fire hydrants sa tibuok siyudad ug kung asa kini nahimutang alang sa daling pagpangita sa kabomberohan.

Nasayran gikan sa Metro Cebu Water District (MCWD) nga aduna kini 623 ka mga fire hydrants sa tibuok Sugbu base sa uwahing record sa 2010, apan wala pa matino kung pila niini ang naa sa dakbayan sa Sugbu.

Si Senior Superintendent Anderson Comar sa City Fire Department gimandoan ni Rama sa pagsusi sa tanang lokasyon sa mga fire hydrants sa Sugbo aron dali ra kining masubay panahon nga dunay sunog.

Si Comar miingon nga dunay usa ka fire hydrant nga misikit na sa bungbong sa usa ka panimalay eskina sa dalan Aviola ug T. Padilla duol sa nahitaboan sa sunog sa barangay Tejero niadtong Sabado apan naglisod sila paggamit niini.

Matud ni Comar pabor nga adunay fire hydrants matag 200 metros ingon man usab ang matag eskina. Kini aron dali nga madaganan sa mga bombero kung mahutdan sila og tubig.

Atol sa sunog sa Tejero miabot sa kapin 100 ka panimalay ang naugdaw ug dunay mga nangaangol. Ang kagamhanan sa siyudad sa Sugbo padayon nga nagpadala karon og mga tents, pagkaon ug portable toilets alang sa mga biktima.

Usa sa mga biktima sa sunog nga si Remarie Aquelineo misaysay dinhi sa Banat News nga nag-abang sa usa ka boarding house sa maong lugar walay nasalbar sa iyang butang.

Si Konsehal Gary Lao sa barangay Tejero misaysay sa Banat News nga ang Philippine National Red Cross (PNRC) lakip sa miabag karon sa ilang barangay.

Samtang susihon una kung kinsa nga balay ang maapektohan sa re-blocking ug sa road widening sa maong dapit. Si Kongresista Tomas Osmeña misaad nga mohatag og bugas ngadto sa mga biktima. (BANATNEWS)