Imbestigasyon sa namatay nga inmate gisugdan

CEBU, Philippines - Gipaabot nalang sa mga sakop sa Investigation and Detective Management Branch (IDMB) sa Cebu City Police Office (CCPO) nga makaduso og Investigation Report (IR) si Chief Insp. Michael Anthony Bastes ang kanhi hepe sa Fuente Police Station kabahin sa ilang piniriso nga namatay niadtong Biyernes sa tungang gabii tungod sa giingong pagpangulata.

Si Chief Insp. Bonifacio Garciano, hepe sa Theft and Robbery Section (TRS) nagkanayon nga ilang gitutukan ang imbestigasyon sa kasong administratiba batok ni Bastes ug sa iyang tulo ka mga sakop.

Ang Homicide Section duna nay gi-imbitar nga upat ka sibilyan nga sakop sa Tracker Team nga maoy gidudahang mibunal-bunal og gahi nga butang kang Joven Tejano.

Si Tejano nga gipasanginlang nanglungkab nadiskobrehang naglisod na sa pagginhawa sulod sa detention cell niadtong Huwebes hinungdan nga gidala kini sa Cebu City Medical Center (CCMC) apan nakabsan sa       kinabuhi.

Sa awtopsiya sa PNP Crime Laboratory aduna kini grabeng bun-og sa kalawasan ug giingong nangabali ang mga gusok niini nga posibleng bunga sa pagbunal og gahi nga butang nga nakaingon sa iyang kamatayon.

Wala pay matumbok si kinsa gyud ang responsable sa krimen apan matud pa sa kapolisan dunay mga batang miila sa mga sakop sa tracker team nga maoy giingong mibunal-bunal kang Tejano atol sa pagdakop una pa kini gi-turnover sa Fuente Police Station.

Sila si Insp. Keth Andaya, deputy ni Bastes, PO2 Allan Vallejo, PO2 Eduardo Acop, PO1 Rey Fabroa nakaduso na og pamahayag ngadto sa IMDB. (BANATNEWS)