2 patay, 9 angol sa bangga

CEBU, Philippines - Duha ang patay samtang siyam ka tawo ang nangaangol sa duha ka aksidente sa kadalanan sa habagatang bahin sa Sugbu niadtong adlaw’ng Sabado ug Domingo sa gabii.

Sa lungsod sa Argao, namatay ang usa ka truckboy nga si Jovanie Villaflor Mier,24, taga sitio Kalumboyan sa barangay Bogo sa samang lungsod human mapunggit sa Ceres bus ang ilang gisakyang Isuzu dumptruck diha sa national highway sa sitio Tikoy sa mao gihapong lungsod niadtong Domingo sa alas-6:30.

Samtang naangol usab sa mga kauban niining mga truckboys nga sila si Pascual Mamac Remundo, 35, Jomar Gealon, 24, Eduardo Mier, apil sa naangol ang pasaherong babaye sa maong bus nga si Miraflor Osayta, 20, taga barangay Hagdan lungsod sa Oslob.

Samtang luwas hinuon ang drayber sa Isuzu Elf nga si Ritchie Davin Lanticse, 29, ug ang drayber sa bus nga si Robert Borja Doctor, 43, kasamtangang nagpuyo sa Talisay, Santander.

Subay sa imbestigasyon ang trak gikan sa Poblacion, Argao paingon sa barangay Bogo samtang ang bus gikan sa lungsod sa Santander paingon sa dakbayan sa Sugbo ug nagsugat sa maong dapit.

Matud ni PO1 Bryan Yosores sa Argao Police Station dihang nahinabi sa Banat News kalit mibuto ang pangunahang ligid sa bus hinungdan nga nawad-an og kontrol ang drayber ug mibangga sa gikasugat nga dumptruck.

Ang mga truckboys nga nagtungtong sa ibabaw sa trak nga puno og puting balas nangalagpot ug napiit ug nangabalian og tiil ug ang tanan gihatud sa Isidro Kintanar Memorial Hospital apan si Jovanie nga grabi gilahos sa Vicente Sotto Memorial Medical Center (VSMMC) apan namatay gyud kini pag-abot sa maong tambalanan.

Boluntaryong mitahan sa kapolisan si Doctor samtang gihikay ang kasong ipasaka batok niya. Niadtong Sabado sa gabii, laing aksidente ang nahitabo diha sa barangay Valencia sa siyudad sa Carcar nga mikalas og usa ka ginang ug miangol og lima ka tawo human magsampok ang duha ka motorsiklo.

Patay nang nadangat sa tambalanan si Narra Malubay, 46, inahan sa naangol usab nga drayber sa motorsiklo nga si Ronald Malubay, 21, nga mga molupyo sa barangay Buenavista sa maong siyudad.

Naangol usab ang drayber sa gikabanggang motor nga si Gerome Apao,19, ingon man ang tulo niini ka pasaherong sila si Aldy Lusa, Vincent Apao ug Nicole Hemaya.

Matud ni SPO1 Joseph Quimod, traffic investigator sa Carcar City Police Station dihang nahinabi sa Banat News pag-abot sa kurbadahong bahin sa maong lugar nagkasugat ang duha ka motor apan tungod sa kakusog sa dagan ni Apao mikawat kini sa pikas linya ug nasampak sa motorsiklo sa mga Malubay.

Tungod niini nangalabay ang tanang angkas ug drayber ug pulos gihatod sa Carcar District Hospital apan gibalhin ang babayeng Malubay sa Vicente Sotto Memorial Medical Center (VSMMC) sa dakbayan sa Sugbo apan gideklarar nga dead on arrival tungod sa kadaot sa ulo niini.

Ang kapolisan padayon pa sa imbestigasyon kung si kinsa ang angayang manubag sa duha ka aksidente. (EIM)  (BANATNEWS)