Mangilkilay'ng grupo sud sa PUJ ipasanta

CEBU, Philippines - Ang hepe sa Cebu City Anti-Mendicancy Task Force (CCAMTF) nga si Isabelita Ganub miawhag sa mga drayber sa PUJ nga badlongon ang grupo sa mga batan-on nga mangangkas og kalit sa ilang sakyanan ug kalit lang mangayo og sensiyo sa mga pasahero.

Nagkanayon si Ganub nga naa sa drayber ang unang responsibilidad sa pagsita sa maong mga batan-on.

Kanunay nga nag-roving karon ang CCAMTF sa mga kadalanan aron masumpo ang mga batan-on nga mopasangil lang og kanta-kanta sulod sa jeep dayong pangayo og kuwarta sa mga pasahero.

Alang kang Ganub nga kun gidid-an sa kagamhanan ang tinuod nga makililimos sa pagpangayo og limos sa mga katawhan sa karsada ug sakyanan tungod kay makagusbat sa moral sa mga Sugboanon, mas labaw’ng ngil-ad ang mga batan-ong lig-on pa og lawas nga magpakilimos nga nagpasabot sa ilang pagkataspokan nga dili angayang duyogan og padasigon sa katawhan.

Apan nasabtan sa hepe sa CCAMTF nga kun makahigayon kining mga grupoha   manulis kini sa mga pasahero sulod sa sakyanan. Busa ang CCAMTF miawhag usab sa buhatan sa City Traffic Operations Management (CITOM) nga mokooperar sa ilang operasyon.

Gusto usab ni Ganub nga mahilakip sa seminar ang mga drayber aron masayran nila ang nagkadaiya nilang responsibilidad partikular sa pagprotehir sa ilang mga pasahero.

Ginadili sa siyudad ang pagpakalimos ug kini nagtangag sa multa nga P500, base sa City Ordinance 1631.  - BANAT NEWS