Barangay nga peligro sa baha giila

CEBU, Philippines - Giila sa Mines and Geosciences Bureau (MGB) 7 sa Department of Environment and Natural Resources (DENR) 7 ang nagkalainlaing barangay sa dakbayan sa Mandaue nga kanunay nga mahulga sa pagbaha sa panahon sa bagyo ug kusog nga pagbunok sa ulan.

Si MGB 7 Director Loreto Alburo   miila sa maong mga barangay   nga mao ang barangay Subangdaku, Mantuyong, Umapad, Opao, Alang-Alang, Guizo ug Paknaan.

Ang maong mga barangay   sumala ni Alburo susama ra usab sa ubang barangay sa dakbayan ug sa lalawigan sa Sugbo nga kanunay nga gihulga sa mga baha ug pagdahili sa yuta sa higayon nga mokusog ang ulan.

Naglakip sa mga dakbayan ug lungsod   sa lalawigan nga mamiligro sa baha o pagdahili sa yuta mao ang dakbayan sa Naga, lungsod sa Ginatilan, dakbayan sa Toldeo ug uban pa.

Matud pa ni Alburo nga ang mga barangay sa dakbayan sa Sugbo nga mamiligro sa maong matang sa katalagman hugtanong   gipahimangnoan ang mga lokal opisyal niini sa paghimo og mga lakang aron kalikayan ang pagkalas og kinabuhi kun moabot ang kadaot sa panahon.

Si Board Member Thadeo Ouano nga maoy chairman sa committee on environment sa hunta probinsiyal hugtanong nagpahimangno sa mga molupyo nga kanunay nga magmabinantayon aron maluwas gikan sa mga katalagman nga mugna sa kinaiyahan.  - BANAT NEWS