Patrol car midasmag sa poste polis angol

CEBU, Philippines - Naangol ang usa ka polis human modasmag sa poste sa kuryente ang gimaneho niining patrol car didto sa sitio Landing, barangay Poblacion, lungsod sa Medellin kagahapon sa kaadlawon.

Daling gidala ngadto sa Severo Verallo District Hospital si SPO4 Carlos Condino kinsa lumad nga taga barangay Agujo, Daanbantayan ug nadestino sa Medellin Police Station.

Si Condino kinsa nagsul-ob og uniporme sakay sa Innova patrol car nga nagtangag sa plakang SJX-966 , giugkat sa iyang mga kauban kay napiit kini sulod sakyanan ug gidala ngadto sa nahisgutang tambalanan.

Base sa report nga si Condino mibiya gikan sa police station mga alas 3:00 sa kadlawon kagahapon ug dihang paingon na unta kining mobalik sa police station matud pa gipabulhot og maayo niini ang sakyanan apan misipyat ang iyang paggunit sa manibela hinungdan nga gidasmagan sa iyang patrol car ang poste sa kuryente sa daplin sa karsada.

Apan sa kalagot sa sakyanan, milahos pa kini pagdasmag   sa punoan sa Mahogany sa maong lugar, puslan man.

Si Condino nakaangkon og grabeng kadaot sa iyang lawas ug maayong pagkagusbat ang simod sa patrol car.

Ang hepe sa Medellin Police Station nga si Inspector Manuel Singson mibutyag nga on duty si Condino sa maong higayon ug gisuta nila kun unsang alarmaha ang gitubag niini, kay alas 3:00 sa kaadlawon man hangtud sa alas 5:00 sa buntag ang schedule sa pagpatrolya niini .

Si Condino kanhi nadestino sa Bantayan Police Station apan gibalhin siya ngadto sa Medellin Police Station sa milabay’ng tuig human pasanginli nga nagpabuto sa iyang armas samtang hubog.

 Si Sr. Supt. Patrocinio Comendador, hepe sa Cebu Provincial Police Office nagkanayon nga ang CPPO mopahigayon og imbestigasyon sa maong insidente.

Ang Provincial Investigator and Detective Management Branch nga gipangulohan ni manlalaban Julius Ompad maoy gitahasan sa pag-imbistigar sa maong hitabo. - Ug Ria Mae Y. Booc sa The Freeman/WC (BANAT NEWS)