Kaparian sa Sugbo mosuportang Palma

CEBU, Philippines - Misaad sa ilang siyento porsiyentong suporta ang Archdiocese sa Sugbu ngadto ni Archbishop Jose Palma kinsa maoy napiling pangulo sa Catholic Bishops Conference of the Philippines (CBCP).

Ang 60-anyos nga si Palma kinsa niadto lang Enero nainstalar isip ikaupat nga Arsobispo sa Sugbu, mohulip sa posisyon ni Bishop Nereo Odchimar ug magsugod sa iyang katungdanan isip presidente sa CBCP karong Disyembre.

Si Palma mipakita og nindot nga performace isip bise-presidente sa CBCP ug tungod niini, direkta na siyang gitudlo sa mga kaubanan niyang mga Obispo isip pangulo sa labing impluwensiyadong hugpong sa kaparian.

Apan dungan sa pagkalingkod ni Palma sa labing taas nga posisyon sa CBCP, mao ang nagtipun-og nga isyu ug suliran nga giatubang sa Simbahang Katoliko lakip na niini ang nagkainit nga isyu sa   pagdawat og mga mahalon nga sakyanan sa pipila ka Obispo gikan sa Philippine Charity Sweepstakes Office (PCSO) niadtong panahon ni kani Presidente Gloria Macapagal Arroyo.

Hinuon, wala mabalaka niini ang Episcopal Vicar sa Archdiocese of Cebu nga si Msgr. Esteban Binghay kinsa masaligon nga masulbad sa CBCP ang maong mga suliran sa pagpangulo ni Palma .

 “Kaya ni niya ( Palma ), anad na siya ani. Pero natural ra baya ning mga in-ani nga mga problema tungod kay pinaagi niini malimpiyohan nato ang simbahan,” matud pa ni Binghay sa Banat News.

Gipasabot usab ni Binghay nga dili mamahimong lisud alang sa Arsobispo ang pagbahin sa iyang responsibilidad isip CBCP president ug Arsobispo sa Sugbu.

 “Dili man hinuon kini mag-conflict kay twice a year raman ning meeting sa CBCP. He will still base and continue to act as the shepherd of the Archdiocese,” dugang pa ni Binghay.  - BANAT NEWS