Fernandez buot hatagan og gahom pinaagi sa CCRBC

CEBU, Philippines - Si Konsehal Joseph Bernard Odilao sa dakbayan sa Talisay mipasar og resolusyon atol sa ilang gipahigayong sesyon niadtong Martes nga nagsuporta sa katukuran sa Central Cebu River Basin Council (CCRBC).

Ang Resolusyon Numero 2011-24-3 kung maaprobahan kini sa konseho maghatag og pagtugot kang Mayor Socrates Fernandez nga molambigit og memorandum of agreement (MOA) tali ngadto sa ubang mga government units ug Department of Environment and Natural Resources (DENR) ug sa River Basin Control Office sa pagsuporta sa katukuran sa CCRBC.

Si Odilao kinsa chairman sa council committee on environment nagkanayon nga ang maong lakang alang kini sa pag-organisa sa papel sa siyudad sa pagprotekta, pag-develop, management ug paggamit sa natural resources sa Central Cebu River Basins.

Ang tipik sa nahisgutang resolusyon nagkanayon nga “water and other natural resources within Central Cebu is recognized as vital resources that needs to be properly managed to sustain the social and economic development of Cebu”.

Si Odilao nagkanayon nga ang Talisay naila sa iyang pagkaabunda sa tubig hinungdan nga gitawag kini og “aqua city” sa Sugbo ug ang mga residente sa siyudad makabenepisyo sa maong resources sa taas nga panahon kung maayo ang pagkadumala niini.

Si Odilao midugang nga kung duna nay magamang MOA ang siyudad makig-coordinate dayon sa River Basins Control Office. Ang River Basins Control Office nagama kini ubos sa Executive Order (EO) Numero 518. (BANAT NEWS)